Abahambe abantu bayofakaza kwiKhomishini yeJaji uZondo
MHLELI: Ngiyakholwa ukuthi ukuphawula kwami ngezinto ezenzeka kwiKhomishini eholwa yiJaji uZondo akuphambani nomthetho.
Ngifisa ukuqala ngibonge umsebenzi omuhle owenziwa yithimba elisebenza neJaji uZondo kanye nabo bonke ofakazi ababe nesibindi sokuza kwiKhomishini ukuze abantu baseNingizimu Afrika bathole ulwazi ngenkohlakalo enuka phu ebiyenzeka kube kukhohliswa abantu kuthiwe yonke into ihamba kahle.
Izigcawu esesizibonile kwiKhomishini zenza kukhanye bha ukuthi izwe lethu bese liphendulwe umkhoma ngamasela ebezixebulela nje kuwo ngaphandle kokwesaba.
Siyakuqaphela njalo ukuvela kweminye imibala kulabo bantu ebesibazi njengabantu abalwa nenkohlakalo.Sibathola manje behlasela abantu abethula ubufakazi phambi kweKhomishini.
Lapha singabala uMnuz Julius Malema newele lakhe, uMnuz Floyd Shivambu, asebeke bahlasela ngamazwi uMnuz Pravin Gordhan.
Lokhu kuyathusa futhi kwenza abantu bazibuze ukuthi yini eyenza batatazele kangaka kuhle kwenkukhu ifuna ukubeka iqanda. Sekujike kuphi manje ngoba sibazi bengabantu ebebengayifuni inkohlakalo.
UMnuz Jacob Zuma, uyabazi ePhalamende. Kungenzeka yini ukuthi babekhomba inkohlakalo kuZuma ukuze kunganakwa eyabo?
Ngikhuluma ngiwumlomo wabantu baseNingizimu Afrika okuyibona abahlukunyezwe wukwebiwa kwemali obekumele ithuthukise impilo yabo.
Siyanxusa bonke abanolwazi ngokulawulwa koMbuso yidlanzana ukuba baphumele obala baveze wonke amanyundululu abenzeka singaboni.