UTinkler neqhinga lezembe
UZOSEBENZISA umdlalo waMaZulu ukufaka itwetwe ngezembe kubadlali bakhe umqeqeshi weChippa United, u-Eric Tinkler.
Iqembu likaTinkler lizokwamukela leli qembu laKwaZulu Natal namuhla ngo-8 ebusuku ngaphansi kwe-Absa Premiership eNelson Mandela Bay Stadium, ePort Elizabeth.
UTinkler uthe akasathandi ukukhuluma ngamathuba ayekwa abadlali bakhe ngoba uzogcina esefana nomqeqeshi ohlale ecasha ngesithupha njalo uma izinto zingamhambelanga kahle. Kusukela uTinkler efikile kwiChippa izinto zishintshile kwazise iqembu alisavuzisi amagoli ngendlela ebelenza ngayo ngaphansi kukaDan Malesela.
Nakuba lo mqeqeshi wodumo kwi-Bidvest Wits, Orlando Pirates, Cape Town City neSuperSport United, ezishaya isifuba ngasekwenzile kwiChilli Boys kodwa usakhala ngendlela abangayitholi ngayo imiphumela emihle ngokuyeka amagoli yize bewakha ngendlela emgculisayo amathuba. “Angazi noma kufanele sishintshe umuntu osinika umuthi noma cha,” usho kanje uTinkler sakuncokola beqeda ukucazelana ngamaphuzu neMaritzburg United, eMgungundlovu ngoLwesibili ebusuku.
“Inkinga yami enkulu ukuthi ngigcina ngingasazi ukuthi kufanele ngithini kubadlali ngoba amathuba bawakha ngendlela esisuke sihlele ngayo. Okunye okuyinkinga kimina ukuthi ngendlela abadlali abenza kahle ngayo ejimini ekuqedelweni kwamathuba ngigcina sengikholwa ukuthi le nkinga sesidlulile kuyona.
“Indaba iqala uma sekusemdlalweni. Angazi noma kukhona obasabisayo abadlali ngokuthi uzobalimaza uma bebhakuzisa inethi, angazi ngempela. Engikwaziyo ukuthi selikhona iqhinga engizolizama uma sesibhekene noSuthu ekhaya,” kusho uTinkler.
Uma Usuthu lukuphinda olukwenze eMakhulong Stadium lushaya iHighlands Park, luzolingana neChippa kodwa uTinkler ubona iqhinga lokusebenzisa khona lokhu ukuthusa abadlali bakhe.
“Akekho ongazi ukuthi AmaZulu aphucwe amaphuzu ayisithupha. Uma sizithola sesilingana nawo ngamaphuzu nemidlalo ilingana nakanjani nathi silengela eweni lezembe. Ngiyazi ayikho into ethusa abadlali njengokugencwa yizembe. Ngakho-ke ngizolokhu ngiyifake njalo eyobungozi bezembe ukuze bangene enkundleni noSuthu bezimisele ukufela enkundleni,” usho kanje lo mqeqeshi ejobelela ngokuthi unethemba lokuthi leli qhinga lizosebenza ngoba usekuzame konke akwaziyo nabo abadlali bayakwazi lokhu.