Ithemba lokuqeda ishobolo koweSuperSport
INJINI yeSuperSport United, uTebogo Mokoena, ikholwa wukuthi uma bengasebenza kanzima ngokubambisana bangaliqeda ishobolo leminyaka lokwehlulwa ngomakhelwane iMamelodi Sundowns.
ISuperSport izobhekana neSundowns emdlalweni we-Absa Premiership wabakhaya baseTshwane eLucas Moripe Stadium ngeSonto ngo-3.30 ntambama. Isihluleke amahlandla ayisishiyagalolunye ukwehlula iSundowns.
Amatsatsantsa a Pitori agcine ukwehlula iSundowns ngesizini ka-2012/2013. UMokoena uthe ukubhekana nabadlali abanamava beSundowns enkabeni yenkundla okukhona kubona uTiyani Mabunda noHlompho Kekana, kuyamgqugquzela.
“Ukubhekana neSundowns kunginika ithuba lokukhombisa engingakwenza enkundleni. Laba badlali ngikhule ngibabuka kwithelevishini kodwa manje sengigijima nabo enkundleni. Lokho kuyangigqugquzela kakhulu neqembu lonke. Kufanele sisebenze kanzima njengeqembu. Sizowuwina umdlalo,” kusho uMokoena.
ISuperSport iyiqale kahle isizini ye-Absa Premiership iqoqa amaphuzu abalulekile. Ifinyelele kowamanqamu weMTN8 kodwa yagcina ikhale ngaphansi kwiCape Town City eThekwini.
Nokho izinto aziyihambeli kahle kwiligi. Kusuka Amatsatsantsa ehlule iBlack Leopards ngo 4-0 ngoSepthemba, asawine umdlalo owodwa abekade ebhekene kuwona neFree State Stars. Adlale ngokulingana kwemine.
ISundowns isendaweni yesihlanu ngamaphuzu awu18 emuva kwemidlalo ewu-10. Iyona kuphela iqembu elingakehlulwa kwiPremiership kusuka kuqale isizini ka-2018/2019.
Umqeqeshi weSuperSport, uKaitano Tembo, uhambe emazwini kaMokoena, wathi ukholwa wukuthi basesimeni esihle sokuqeda ishobolo lokuhlulwa yiSundowns.
“Kuzoba wumdlalo onzima ngoba emidlalweni eyisishiyagalolunye edlule asikaze siyehlule iSundowns. Ngicabanga ukuthi umphumela ongcono siwuthole ngesizini edlule lapho sidlale ngokulingana ngo 1-1. Ngakho kuzoba wumdlalo onzima njengayo yonke imidlalo yabakhaya. Kodwa ngicabanga ukuthi sisesimemi esihle ngokomqondo uma uqhathanisa nangesizini edlule. Kuzoba wumdlalo ohlukile ngasohlangothini lokuzethemba. Ngibona umdlalo omuhle kuwona womabili amaqembu. Ngicabanga ukuthi lesi yisikhathi sokushintsha izinto, siwine ngeSonto.”