Siwafuna ephelele amaphuzu: Solinas
UMQEQESHI weKaizer Chiefs, uGiovanni Solinas, uthi uwafuna ephelele amaphuzu kwiLamontville Golden Arrows ngoba ufuna ezakhe ziphefumulele eduze kwamaqembu amathathu azihola phambili kwi-log ye-Absa Premiership.
IChiefs izodlala naBafana Bes’thende kusasa, emdlalweni we-Absa Premiership ePrincess Magogo Stadium, KwaMashu, kusasa ngo-6 ntambama.
Ziya kulo mdlalo nje, Amakhosi selokhu agcina ukunqoba umdlalo weligi ebhekene neBlack Leopards ngoNovemba 7. Anqoba lowo mdlalo ngo 1-0, eFNB Stadium.
I-Arrows yona yagcina ukunqoba ngo-Okthoba 7, nayo yashaya iqembu elifanayo iLeopards ngo 1-0, ePrincess Magogo Stadium.
IChiefs isendaweni yesithupha kwi-log ngamaphuzu awu-18, emidlalweni ewu-13. I-Arrows isendaweni ka-11, ngamaphuzu awu-12, emidlalweni ewu-12.
Abafana Bokuthula Noxolo bazoya emdlalweni behambela phezulu ngemuva kokulobola iqembu laseZanzibar, iZimamoto FC ngo 4-0 emdlalweni weCAF Confederation Cup eNelson Mandela Bay Stadium, ePort Elizabeth, ngoLwesithathu ebusuku.
Amagoli amathathu eChiefs kulo mdlalo avalelwe phakathi uKhama Billiat, kwathi elinye lashaywa uKabelo Mahlasela.
Ekhuluma nabezindaba uSolinas ngemuva komdlalo wezakhe neZimamoto, uthe umdlalo wabo ne-Arrows ubaluleke kakhulu njengoba bengafuni ukusala kakhulu emaqenjini amathathu azihola phambili, okuyiOrlando Pirates eqhwakele, iBloemfontein Celitc esendaweni yesibili neBidvest Wits esendaweni yesithathu. “Kubaluleke kakhulu ukuthi sinqobe kwi-Arrows ngoba asifuni asishiye kakhulu amaqembu amathathu azihola phambili kwi-log. Imidlalo yethu iminyene kakhulu ngoba sinezinsuku ezimbili nje vo, ngaphambi kowe-Arrows kodwa lokho akusho lutho ngoba esikufunayo amaphuzu kwaphela. Yonke imidlalo yeChiefs ifana neyamanqamu,” kusho uSolinas. Okunye okuvezwe yilo mqeqeshi ukuthi kungenzeka kube khona izinguquko kubadlali emdlalweni ne-Arrows ngenxa yokuthi imidlalo ithothene kakhulu, abadlali badinga ukuphumula. “Uma ubuka kuleli sonto, sinemidlalo emithathu ezinsukwini eziyisikhombisa. Iqiniso ukuthi njalo uma sidlala sidinga abadlali abangakhathele, okusho ukuthi sizoshintshanisa abadlali uma sifuna ukugcina umgqigqo wethu uqhubeke,” kubeka uSolinas obecacisa ukuthi usazolokhu esishintsha isikimu emidlalweni yaleli qembu. IChiefs ithelwe othulini yiPirates 2-1 emdlalweni weTelkom Knockout eMoses Mabhida Stadium eThekwini. ngo