ISanta Fe igabe ngobukhazikhazi
BAKHUPHULE izinga abakwaHyundai ngeSanta Fe okungenye yezimoto zabo eziphakeme abasanda kuyikhipha.
Ubuhle bayo nobuchwepheshe obukuyona, benza ungayikhaleli imali yakho futhi ayimbi eqolo ngokwezinga layo eliphezulu.
Iphinde yengezwa nezihlalo njengoba ilayisha abantu abayisikhombisa.
Yethulwe ngokusemthethweni ngoMsombuluko eCanelands Beach Club, eSalt Rock.
Ngesikhathi yethulwa, abakwaHyundai bakusho bangasaba ukuthi imoto yabo izobhincisela nxanye eziningi ezisezingeni layo njengoba beveze inqwaba yezimoto ezisezingeni layo kodwa bathi ngeke zilibone elidlalayo.
Phakathi kwazo kukhona iToyota Fortuner, Ford Everest, BMW X5 nezinye.
Abakushilo ngayo ikufakazele ngesikhathi sihamba ngayo.
Phakathi intofontofo ngendlela eyinqaba futhi inezihlalo zesikhumba kuphela.
Inamandla amaningi futhi yenza ukhohlwe ngisho ukuthi uhamba ngemoto enkulu ngendlela eshesha ngayo.
Emgwaqweni iyazimelela futhi akukho okwenza ube novalo uma uhamba ngayo ngoba ibhalansile.
Engingakuthandanga ngayo umsindo obubuye uzwakale engathi kungena umoya emawindini angaphambili okungaqondakali ukuthi udalwa yini ngoba ubuye unqamuke.
Ngale kwalokho akukho okungenza ungayijabuleli le moto, ikakhulukazi njengoba iyimoto yomndeni. Iqhubeka ekhasini 3