Ahlukile amandla ophethroli
SAPHINDA sahlangana kuyo leyo nkundla okusho ukuthi sekuyilo olungaliyo othi sekufanele sicinge isikhundla esiphephile wena owabona inkukhu uma ifuna ukuzalela iqanda.
Njengemihla siyacela ukuthi singavele siyibhadeke nje maphakathi nomgwaqo imoto yethu kepha masicingisise indawo efanele engaphandle ukuze sidedele ukuhamba ngokukhululeka kwezimoto bese sihlokoloza ama hazard ethu kwelakho lodumo lokuwela umfula ugcwele.
Namhlanje sisukunyiswa yindaba ethi mayincike kweyangesonto eledlule yize yona ingenabo ubungozi obungako. Ake sicaphune nayi incwadi evela komunye umfundi wale ngosi.
“Mfoka Shangase nakhu nginokudideka lana. Ngithe ngihamba nomakhenikha wami sabe sesidlula kwelinye lama garaji la edolobheni langasekhaya. Ngaleso sikhathi besihamba ngemoto yami kwazise ubeqeda ukuyilungisa ezinye izinto, sisathi sisayivivinya nje ukuze sizwe ukuthi konke kuhambe kahle yini. Ngidideka la esethi asifake uphethroli oluhlaza kanti mina le moto ngiyazi ifakwa uphethroli obomvu. Ngithe uma ngimbuza ukuthi uwufaka kanjani uphethroli oluhlaza ekubeni le moto iphuza uphethroli obomvu, wavele wathi uphethroli uyafana imoto ngeke ibe nankinga.Kungabe kuyiqiniso lokho mfoka Shangase? Ozithobayo uBongani Jeza.”
Ngaphambi kokuthi singene empendulweni yalo mbuzo kaMnuz Jeza, make siqale ekuhlaziyeni ukusebenza kophethroli ababili obomvu noluhlaza. Obomvu ubizwa nge Lead Replacement Fuel (LRP). Kuze kube khona iLRP nje kusukela ekutheni izimoto zakudala bezidinga isibabuli esibukhali esibizwa nge lead ukuze zihambe kahle. Ngokocwaningo lwama hazard onjiniya bafaka lesi sithako esibizwa nge lead ngoba befuna ukuthi imoto idume kalula futhi ibe namandla ngesikhathi esisodwa futhi bengafuni ukuthi kwakhele umulwe kuma valve.
Lokho kwenza ukuthi bafake isibabuli esibizwa nge lead. Yiso lesi esasenza ukuthi imoto iligeqe ipayipi emumva lize libe mpunga engathi lithelwe ngomlotha. Ontanga bami bazongivumela ukuthi impilo yenjini ibibukwa epayipini ukuthi linjani. Uma limnyama bebekhala abantu bethi kukhona okungalungile kuleyo moto okungaba ukuthi isiphelelwe ama ringi phakathi enjinini noma ifaka uphethroli omningi kunofanele bese iyehluleka ukuwushisa, lokho-ke kwakudala ukuthi ligqunqe ipayipi.
Ngasekupheleni kweminyaka yo-1970 kwaqapheleka ukuthi isibabuli okuthakwa ngaso uphethroli sidala ukuthi imoto ikhafule isisi (carbon dioxide) esingcolisa umoya emhlabeni. Kulapho-ke kwathathwa isinqumo sokuthi kuqedwe nya ngophethroli obukhali ngokuthi kuncishiswe noma kuqedwe ukuthakwa ngelead uphethroli.
Thina sizalwe kukhona uphethroli owawubizwa nge-98. Loyo-ke wawushesha ukuvutha kodwa bese ukhipha isisi esinzima kakhulu emsileni wemoto. Kuhambe kwahamba kwaqedwa nya nge-98, kwasala i-97 ne-95.
Nayo yize ibisinciphisile ku lead kodwa kugcine kuthathwa isinqumo sokuthi iphele nya i-lead. Yilapho-ke okugcine sekuvela uphethroli obizwa nge lead replacement fuel obomvu kodwa ongenaso isibabuli se lead. Oluhlaza awunaso ngisho isibambisi se-lead yingakho ubizwa nge unleaded.
Zonke izimoto ezakhiwe ngeminyaka yo-1990 kuza neno ziyakwazi ukuduma ngazo zombili lezinhlobo zikaphethroli obomvu noluhlaza. Kuleli zwe iqedwe nya i-97 ngo-2006 kwasala i-95 ebuyekeziwe yakhishwa isibabuli ne-93 yona engenaso isithako esibambele isibabuli se lead.
Imoto eneminyaka engaphansi kuka-20 iyakwazi ukuduma ngazo zombili lezi zinhlobo ukuthi i-95 iyinika amandla kancane kodwa ibe ingawalimazi ama-valve bese kuthi i-93 ithe ukuthamba. Uma imoto yakho ingajwayele ukuba sezindaweni ezigudle ugu lapho umswakama umningi ungayifaka i-95 wenzela ukuthi ikwazi ukusebenza kahle.
Nansi-ke impendulo eya kumbhali wencwadi ebuzayo.
Mfoka Jeza, awubange usasho ukuthi imoto yakho eyamuphi unyaka besizophendula siqonde kodwa uma imoto yakho ineminyaka engaphezu kuka-20 yakhiwa, isebenzisa kakhulu obomvu kodwa uma yakhiwe ngemuva kuka-1996 ungazikhathazi, vele idla oluhlaza.
Uma uke wafaka uphethroli oluhlaza esikhundleni sobomvu inkinga ingaba semandleni kuphela nokuthi-ke ama-valve akho azothatha isikhashana ukujwayela lolo hlobo osulufakile. Abeluleki ngezezimoto bathi uma imoto ijwayele ngasolwandle ithi uma isifika enkabeni yezwe lapho kome kakhulu ixakeke ngakho iyawudinga uphethroli obomvu othe ukuba bukhali.
Ngokunjalo nesuka enkabeni yezwe uma isingasolwandle ifika icinane ngakho iyayidinga into ezohlokazana igazi layo. Uqinisile kancane umakhenikha uma ethi uphethroli uyasebenza kuzo zonke izimoto kodwa bekufanele akuchazele ukuthi ukuphi umehluko njengoba sesiqale ngokuthi sizame ukuwuchaza nje la ngenhla. Siyethemba uyaphenduleka.
Hhayi-ke, sesingawavala lana ama hazard ethu okuphela kwenyanga sibuyele emgwaqweni siqonde ngqo kuDisemba. Sethembe sizohlangana sisawuphonsa umbalane ngoba thina sibuswa yimithetho yezokushayela leli zwe engasivumeli ukuthi sibe osikhwili phambana nobhoko. Uma ufisa siyiqhube le ndaba ngena ekhasini lethu ku Facebook Igedlela