IPhalamende ligunyaze olokudliwa komhlaba
IPHALAMENDE seligunyaze ukuthi kuchitshiyelwe isigatshana u-25 soMthethosisekelo ukuze kudliwe umhlaba ngaphandle kwesinxephezelo.
Izolo kube nenhlokomo ngemuva kokuba le ndlu ivumelene nekomiti ebelibheka indaba yokuchitshiyelwa koMthethosisekelo ukuze uhulumeni ukwazi ukudla umhlaba ngaphandle kwesinxephezelo.
Okhulumela iPhalamende, uMnuz Moloto Mothapo, uthe ikomiti liye emphakathini laba nezigcawu kuleli.
Uthe uma umkhandlu wezifundazwe ugunyaza namhlanje ukuthi uMthethosisekelo uchitshiyelwe kungafakwa umthethosivivinywa ePhalamende.
“Amalungu ePhalamende angaphakamisa lo mthethosivivinywa. Uzobe usushicilelwa bese kuba nezigcawu zomphakathi uyiswe nakuzona zonke iziShayamthetho. Ukuze umthethosivivinyo uphasiswe kushintshwe lesi sigatshana soMthethosisekelo, kudingeka ukuthi usekwe ngamalungu amaningi ePhalamende.”
Uthe uzobe usuya emkhandlwini wezifundazwe wathi ungaphasiswa uma wesekwa izifundazwe eziyisithupha.
USotswebhu we-ANC ePhalamende, uMnuz Jackson Mthembu, uthe kusasa uzokwenza isiphakamiso ePhalamende ukuze kubunjwe ikomiti elizobhekana nokuchitshiyelwa kwalesi sigatshana u-25 soMthethosisekelo.
Uthe umhlaba uzobuyela kubaniniwo wathi uzodliwa ngendlela engeke iphazamise ezolimo.
Amalungu ePhalamende angu-209 avotele ukuchitshiyelwa kwalesi sigatshana kwathi angu-91 abesichitha.