‘Ngangingadlwenguli ngangikhokhisa’
INDODA yaseMaoti, eNanda, esolwa ngokudlwengula iphindelele abesifazane, itshele iNkantolo eNkulu eThekwini, izolo ukuthi ayisazi isibalo sabesifazane eyalala nabo, ababehluleka ukuyikhokhela imali yayo njengoba bengaphezu kuka-55 abesifazane eyayibagada bedayisa umzimba.
UMnuz Amos Ganyeni Ngobeni (29) uqhubekile nokufakaza izolo esephonswa imibuzo umshushini wecala, u-Advocate Noxolo Dube.
Umsolwa ubhekene namacala angu-47, kuwona kubalwa abesifazane abangu-19 okuthiwa wabadlwengula ezindaweni ezahlukene.
Ngokobufakazi bukaNgobeni yena wayengabadlwenguli abaningi kula macala kodwa wayebakhokhisa ngokuya nabo ocansini njengoba babehluleka ukumkhokhela imali yokubagada eGandhi Peace Park lapho babedayisa khona.
U-Advocate Dube ebuza ukuthi bangaki abesifazane ababesebenza ngaphansi kwakhe kumele bamkhokhele ngokubagada, uthe babebaningi kakhulu.
“Kungaba nzima ukuba ngikutshele ukuthi isibalo sabo sasingakanani ababedayisa umzimba. Kodwa uma ngiqagela nje ababesePeace Park babengu-35 kuthi e-Ottawa babengu-20,” kusho uNgobeni.
Ebuzwa ukuthi bonke wayebakhokhisa ngocansi uma bengenayo imali yokukhokha, uthe kwakuhluka.
“Kwakuya ngabantu, abanye abesifazane babekwazi ukungikhokhela ngendlela, singekho isidingo sokuba bangikhokhele ngocansi.
Abanye balaba besifazane babehlala isikhashana bese beyahamba uma sebenemali eyanele, babuyele emakhaya bangabe besawudayisa umzimba,” kusho uNgobeni.
Uthe akukho lapho ayebhala khona phansi ukuthi ubani omkweletayo ngoba amantombazane adayisayo ubesewajwayele, ewazi ngekhanda ukuthi ubani ongakhokhile.
“Ngeke ngiqambe amanga ngithi ngalala nabo bonke laba besifazane kodwa uma sekuvezwa izithombe zabo, ngiyakwazi ukubona ukuthi lona ngalala naye noma cha. Angizange ngiwabhale phansi amagama abesifazane engangilala nabo uma behluleka ukungikhokhela,” kusho uNgobeni.
Ephonswa ngemibuzo uthe laba besifazane babekhokhisana uR50 ngomzuliswano owodwa kubantu ababethenga kubona umzimba. Yena imali yokubagada ngosuku kwakuba uR100. Uthe le mali babemkhokhela njalo ntambama uma sebeqede ukusebenza.
Ukuqulwa kwecala kusaqhubeka.