Kuvalwe iwindi kwiNSFAS zeqile ku-400 000 izicelo
SITHOLE izicelo ezingaphezu kuka-400 000 isikhwama esixhasa izitshudeni ngemali yokufunda, ezikhungweni zemfundo ephakeme iNational Student Financial Aid Scheme (NSFAS).
Lokhu kuvezwe nguNgqongqoshe weMfundo ePhakeme, uNkk Naledi Pandor, izolo ekhuluma nabezindaba eKapa emuva kokuvalwa kwewindi lokufaka izicelo ngeSonto.
UNkk Pandor uthe kudingeka abalesi sikhwama bacubungule izicelo zoxhaso.
“Ngosuku iNSFAS ithole izicelo ezingu-3 200, kwathi sekusondele yathola ezingu-30 000.
U-63% wezicelo ezabesifazane, ezingu-37% ezabesilisa.”
Uthe iNSFAS ithole izicelo ezingu-34 413 zabahola impesheni kahulumeni.
“Izitshudeni ezihola le mali zizoluthola uxhaso uma sezibhalisiwe emakolishi amakhono nasemanyuvesi. Sikhathazekile ngokuthi u-24% wezicelo ezezitshudeni ezifuna ukufunda emakolishi, kuthi u-88% owabafuna ukufunda emanyuvesi,” kusho uNkk Pandor.
Uthe iKwaZulu-Natal yiyona enesibalo esikhulu sezicelo, zingu-95 523, iNorthern Cape yiyona ebe nesibalo esincane ngo-2 573.
Uqhube wathi unethemba lokuthi ngonyaka ozayo lesi sikhwama ngeke sibe nezinkinga.
Kube nezikhalo ngokuthi bekuba nokubambezeleka ekukhishweni kwemali yokuxhasa izitshudeni.
“Siye emasontweni, saya kubafundi kuleli ukuze sibagqugquzele ukuthi bafake izicelo zoxhaso. I-NSFAS ingazise ukuthi abafake izicelo bayajabula ngoba sebekwazi ukufaka izicelo besebenzisa amaselula. Ukuze umuntu athole uxhaso kudingeka ahlangabezane nemibandela ebekiwe. Bazothola imali yokufunda neyezincwadi, ukudla nendawo yokuhlala.”
Usincomile isinqumo sakhe sokuqoka uDkt Randall Carolissen ukulawula lesi sikhwama.
“Sikulungele ukukhipha uR32 billion sixhase izitshudeni ezingaphezulu kuka777 000. Abafake izicelo bazothola i-sms ekuqaleni kwenyanga ezayo (Januwari) yingakho sibanxusa ukuthi bangazishintshi izinombolo zabo zocingo.”