Umnotho wezwe ukhule ngo-2.2%
IZAZI zomnotho zithi kuzogqugquzela abatshalizimali ukuthi bafake imali yabo eNingizimu Afrika emuva kokuthi iStatistician General, uMnuz Risenga Maluleke, simemezele ukuthi umnotho ukhule ngo-2.2% kwikota yesithathu.
UMaluleke uthe lokhu kusho ukuthi iNingizimu Afrika isiphumile kwinzikamnotho. Imikhakha yokwakhiwa kwempahla, owezokuthutha nowezezimali yenze kahle kakhulu.
Isazi somnotho nezomthetho, uSolwazi Bonke Dumisa, sithe iNingizimu Afrika ibikwinzikamnotho (technical recession) ngenxa yokuthi umnotho ubungakhuli ngendlela efanele kodwa izinto zishintshile umnotho wakhula ngo-2.2%.
“Izindaba ezimenyezelwe wuMaluleke zisithinta sonke akuyona into yabantu abanemali ngoba zizogqugquzela abatshalizimali ukuthi batshale imali yabo emnothweni waseNingizimu Afrika. Ngesikhathi izwe likwinzikamnotho abatshalizimali bebengathandi ukufaka imali yabo kodwa manje sizobabona bevula izimboni noma benweba lezo ezikhona. Okunye okubalulekile ngokuphuma kwezwe kwinzikamnotho, wukuthi iRandi liyadlondlobala okusho ukuthi uma sithenga izidingo kwamanye amazwe sikhokha imali encane,” kusho uDumisa.
UMnuz Dave Mohr, oyiChief Investment Strategist kwa-Old Mutual, ugqugquzele abantu ukuthi baqhubeke nokubopha izifociya nokulondoloza imali yabo ezimakethe ngoba ukukhula komnotho kuzobangenisela imali.
Uthe bangawadayisi amasheya abo noma ngabe awezinkampani zaseNingizimu Afrika kuphela ngoba zizojika izinto.
Abatshali zimali bakwamanye amazwe uthe bazongena eNingizimu Afrika uma bebona ukuthi umnotho uyakhula.