UKhisimusi omuncu kwabeNumsa
ANGASE abe noKhisimusi omuncu amalungu eNational Union of Metalworkers of South Africa (Numsa) osekuphele inyanga namasonto amabili etelekile embonini yeplastiki.
Isolezwe lithole ukuthi isiteleka sabasebenzi bemboni yeplastiki esaqala ngo-Okthoba sisaqhubeka futhi izingxoxo phakathi kwabaqashi neNumsa zigcine emasontweni amabili adlule.
Abasebenzi bemboni yeplastiki baqale ukuteleka maphakathi no-Okthoba bekhala ngokwehliselwa iholo labo lisuka kuR40 liya kuR20 ngehora.
Bebekhala nangokuphucwa imihlomulo etholwa ngozakwabo abasebenza ngokusansimbi, ababale kukho ukukhokhelwa uma beya ekhefini nokufakwa esikhwameni sempesheni.
UNkk Phakamile HlubiMajola, obhekele ezokuxhumana kwiNumsa, uthe okwamanje abaqashi abakazilaleli izimfuno zabasebenzi ngakho isiteleka siyaqhubeka.
“Sisaqhubeka isiteleka futhi silinde abaqashi ukuthi balalele izimfuno zabasebenzi. Okwamanje asazi ukuthi izingxoxo ezilandelayo zizoba nini. Abasebenzi baziphethe kahle, bayaqhinqa ngokuthula njengoba bedinga imihlomulo,” kusho uNkk Hlubi-Majola.
Phambilini abaqashi bebekhala ngamalungu eNumsa okuthiwa ahlasela abasebenzi abangatelekile futhi alimaza ingqalasizinda.
UNkk Hlubi-Majola uthe akuwona amalungu abo alimaza abangatelekile ngoba amalungu abo ayaqhinqa futhi awahlaseli muntu.
UMnuz Jaco Swart, weNational Employers Association of South Africa (Neasa), uthe abaqashi bebenezingxoxo neNumsa ngoNovemba 20 kodwa zafinyelela kwangqingetshe.
“INumsa isinqabile isiphakamiso sabaqashi ngakho isiteleka sisaqhubeka.
Sithole imibiko yokuthi kunabasebenzi abafuna ukubuyela emsebenzini kodwa abanikazi bamafemu abakwazi ukuvele bathathe abasebenzi ngenxa yokuthi wudaba oluphethwe kuzwelonke lolu. Uma abaqashi befuna ukubuyisela abasebenzi emsebenzini kufanele bathinte ubuholi beNeasa esifundeni sabo,” kusho uSwart.