Izinselelo ezihambisana nesifo sikashukela
KUTHIWA isifo sikashukela asiphazamisi esimphethe kuphela kodwa nabasondelene naye. Yize kuthiwa zikhona izindlela zokulawula ushukela kodwa kunzima ukuphila impilo ejwayelekile uma unawo.
Okhulumela i-Association for Dietetics in South Africa (ADSA) aphinde abe wungoti oweluleka ngokudla, uNksz Jessica Oosthuizen, uthe isifo sikashukela sihambisana nengcindezi nokhwantalala oluhlasela umndeni wonke uma kunelungu elinawo.
“Ziningi izinselelo ezibhekana nomndeni uma kukhona ilungu elinoshukela. Bangaphezu kuka1.8 million abahlaselwe wuhlobo lukashukela oluwuType 2 ngonyaka odlule, okusho ukuthi miningi imindeni ethintekile.
“Kuyethusa ukuba nelungu elinalesi sifo futhi kuletha ushintsho. Kudingeka ukuthi kwenziwe izinhlelo zokubhekana nezindleko ngoba kuningi okushintshayo. Okuyinselelo kakhulu ukudideka nokungazi ukuthi yini okumele yenziwe kohlaselwe yilesi sifo,” kuchaza yena.
UNksz Oosthuizen uthe isifo sikashukela siyehluka ezinganeni nakwabadala. Uthe ingane kudingeka igadwe ngokwedlulele ukuze iyisebenzise kahle imishanguzo noma umjovo. Konke lokhu uNksz Oosthuizen uthe kuletha ukhwantalala emndenini. Ugcizelele ukuthi kudingeka bazithibe bazinakekele abanalesi sifo nomndeni ubalekelele.
Uveze ukuthi kubalulekile ukuba nomeluleki wendlela okufanele udle ngayo ozochaza ukuthi ukudla okunjani okumele kudliwe onalesi sifo, kuye ngokuthi uphethwe yiluphi uhlobo. Ukhuthaza ukuthi imindeni ayijoyine izinhlangano ezifana neDiabetes South Africa and Youth with Diabetes nezinye ezisezinkundleni zokuxhumana ezingasiza umndeni othintekile.
Ongakwenza ukweseka onoshukela emndenini: *Mkhuthaze azivocavoce. *Akenzelwe ukudla okunempilo okuzowulawula kahle ushukela. *Akaphumule ngokwanele. *Kumele azihlole njalo ukuthola isimo sikashukela egazini.
*Akagweme utshwala neziphuzo ezihlohlozayo.
*Makakhunjuzwe ukuthatha imishanguzo ngesikhathi esifanele.
*Imifino nezithelo kubaluleke kakhulu kwabanoshukela.
*Kumele adle ngezikhathi ezifanele angaze alambe kakhulu.