UMsimang uyibekile induku ebandla: Lala qhawe uphumule!
WATHINTA izinhliziyo zabaningi uMnuz Mendi Msimang ngoDisemba ka-2009 ngomyalezo ayewubhalele unkosikazi wakhe owayengungqongqoshe wezeMpilo kuleli, uDkt Manto Tshabalala-Msimang, owafundwa emngcwabeni wakhe.
Lo myalezo wawuthi: “Uyakhumbula sizibandakanya nezinhlelo ezehlukene nathi eceleni sihlela ukuthi sizothatha umhlalaphansi kanyekanye. Manje sekumele ngilihambe ngedwa leli banga. Ushiye uphawu empilweni yethu nxazonke. Lolo phawu oluzogqama empilweni yomndeni, yabazukulu nabo bonke abakwaziyo. Lezo zikhathi zizoqinisa uthando esinalo futhi uthando lwami ngawe kalusoze lwashabalala. Ngelinye ilanga siyohlangana. Lala kahle sithandwa sami.”
Namahlanje isizwe siyalila ngokuwa kwezinye zezinsika emlandweni womzabalazo wenkululeko yaseNingizimu Afrika njengoba ngoMsombuluko kumenele uMsimang.
Kasazi kwenzekani ngale kwethuna kepha abanganeno kwalo basuke befisa ukuphinda babonane nabathandiweyo babo njengoba kwakufisa uMsimang ngesikhathi eshiywa yinkosikazi yakhe eminyakeni eyisishiyagalolunye eyedlule.
Ngaphandle kwesifundo sokubaluleka nobuhle bothando, uMsimang asivezela isizwe engasuki eceleni komkakhe ezikhathini ezinzima nezimnandi, usisebenzele isizwe.
Ubalwa namaqhawe adela impilo yawo angena empini yokulwela inkululeko yeNingizimu Afrika. Eqenjini elibusayo i-ANC, amagelo akhe angelinganiswe njengoba ebeyilungu lekomiti elibhekela ukuziphatha.
Ubesekomitini eliluleka ngokuthi ngobani okumele bahlonishwe ngumengameli. Kusuka eseyilungu le-ANCYL usebe sezikhundleni ezehlukene okubalwa esokuba nguMgcinimafa we-ANC kusuka ngo-1997 kuya ku-2007.
Ngo-1999 wahlonishwa ngokukhethekile ngendondo yesiliva ngowayengumengameli uMnuz Nelson Mandela ngamagalelo akhe esizweni.
Imiyalezo yenduduzo engenayo ngoMsimang iyakuveza ukuthi amagalelo akhe ayaziwa futhi ayahlonishwa.
Lala uphumule qhawe, sengathi isifiso sakho sokubona isithandwa sakho singafezeka.