Konakele emtholampilo oKwaDabeka
MHLELI: Sicela uMnyango wezeMpilo nohulumeni angenelele kungaze konakale kakhulu ngoba singabasebenzi bomtholampilo waKwaDabeka sesicabanga ukubeka phansi amathuluzi.
Sizamile ukubonisana nabaphathi balo mtholampilo akulungi kahle. Nazi ezinye izinkinga: Abasenzi sebeke bahambisa nohla lwezikhalo kodwa akulungi – abaphathi bathembisa ukulungisa izinto kunenkunzi enguHuman Resources Manager eqinisa ikhanda engafuni ukuza emhlanganweni yabasebenzi ukulalela izikhalo kulungiswe nesimo.
Okubi ngalo HR Manager uyena oshaya amaphiko ngisho isikhulu esiphezulu somtholampilo siyamsaba sizwa yena.
Abasebenzi abanezikhalo uyabasabisa ngokuthi uzobaxosha emsebenzini.
Okubuhlungu ngalo mphathi uzenza ikholwa elikhulu futhi nomphakathi ukhala ngokuthi lapho ekhonza khona uthembisa abantu imisebenzi athi bangamatransfer alethwe uMnyango wesiFunda wezeMpilo (Ethekwini).
Sicele kuphenywe ezezimali kulo mtholampilo. Ngisho izinto zokusebenza ziyashoda.
Nonesi bayashoda kakhulu kodwa banomthamo omkhulu weziguli.
UHR noFinance Manager noSystems Manager bangamathe nolimi – engathi babesebenza nndawonye lapho beqhumuka khona. Bahlangene ngezezimali zomnyango bobathathu.
Uma kubuzwa uFinance Manager uthi amathenda ashodisa impahla ngisho okukubhandisha izilonda.
Nendawo okulinda kuyo iziguli iphuquka uthuli yize kusanda kukhishwa ithenda yokulungisa le ndawo, akuphenywe kuzogula iziguli.
Kunobandlululo odokotela abamnyama bayahlukunyezwa baze bazihambele.
Nomunye osele oyedwa uyahlukunyezwa ubekwa amacala angekho.Ngisho ohlelweni lokukhuthaza abasebenzi, i-EPMDS, wonke umuntu kulo mtholampilo uthola u-3 (nokusho ukuthi wenza umsebenzi ogculisayo) yize abasebenzi bezikhandla umsebenzi umningi.
Bathwele kanzima abasebenzi ngoba kuyagcwala kulo mtholampilo.
Sicela umnyango uphenye ukuthi izimali zishonaphi uma kuhlushekwa kangaka kulo mthompilo yize imali ingena minyaka yonke.
Ezinye zezikhulu azinayo inhlonipho kubasebenzi abangaphansi kwazo.
Nomabhalane bayashoda, kusebenza amavolontiya nawo okunzima ukuthi alandelwe ngomsebenzi ngoba awaholi; umnyango awungenelele.
Kuduka amakhadi eziguli ngenxa yomsebenzi omningi komabhalane.
Sicela nama-pharmacist abantu abamnyama aqashwe nawo kungabi ama-pharmacy assistant wodwa amnyama.
Sicela wonke umsebenzi athole ithuba lokukhula afundiswe emsebenzini.
Nabahlanzi bezindlu bakhala ngenyufomu yokusebenza eshodayo abanye awabalingani baze baphoqeleke ukuyiphinda kaningi lokhu kuletha amagciwane. Awathengwe bo noma banikwe imali esekhona.
Nemiholo yabasebenzi ayicutshungulwe ukuthola ukuthi bahola ngendlela ebafanele yini? Okhathazekile ECLERMONT