Uzoqhulula amahlaya emcimbini wezinwele
BAZOBHEMA bakholwe abazohambela umcimbi waminyaka yonke i-6th African Hair Awards eWavepark Gateway Shopping Centre, eThekwini, ngoLwesihlanu kusukela ngo-6 ntambama. Isilomo somsakazi weGagasi FM uFelix Hlophe sithe izethameli zizobuyela emakhaya ziphethwe yizisu ngenxa yamahlaya azobe ewaqhulula kulo mcimbi.
UFelix uthe ongezufika kulo mcimbi uzophuthelwa ngamahlaya ahlukahlukene azobe ewaqhulula.
“Ngiyaziwa-ke mina ngamahlaya akitazayo nengingawabhali phansi. Kuzobe kuwubusuku nje bamahlaya. Ngizobe ngihlekisa nangezindaba ezisematheni kuleli zinsuku njengezoMalusi Gigaba. Njengoba lo mcimbi uzobe uhanjelwe ngabantu bamazinga angafani futhi nezinhlanga ezihlukahlukene, ngizobe ngisho amahlaya azobe ebafaka bonke,” kuphetha uFelix osakaza uhlelo lwasemini iMidday Shandis kwiGagasi FM phakathi nezinsuku kusukela ngo-12 emini.
UFelix uzobe ephethe uhlelo ngokubambisana nozakwabo uNonjabulo “Njebs” Zwane owenza olwasekuseni i-I Love Mornings with Mzokoloko.
Umgqugquzeli walo mcimbi uNksz Fatima Cele uthe kuningi okuzohlaba izihambeli umxhwele okubalwa kukho izinhlobo zezinwele ezizobe zidlisa ngaleli hlobo, iHair Art-Fashion, izipho ezinhlobonhlobo, ukudla okwehla esiphundu neziphuzo ezizoyizayo nethuba lokwabelana ngolwazi nongoti emkhakheni wezinwele.
“Kuzobe kunezinye izihambeli ezisebenza emikhakheni ehlukahlukene,” kusho uNksz Cele.
Isikhulu ophikweni lwezokwazisa kwiSolezwe, uNksz Noluthando Ngubane, sithe inhlosongqangi ngalo mcimbi ukuvumbulula umpetha kompetha waKwaZulu-Natal ekwenziweni kwezinwele zama-Afrika.
“Sikujabulele kabi ukunikezwa ithuba lokubamba iqhaza kulo mqhudelwano wezinwele ngoba uthinta abantu esibabhalelayo futhi abantu abacwala izinwele ezindaweni zabo ngabafundi bethu njengephephandaba,” kusho uNksz Ngubane.
Kulo mcimbi kuzobe kungenwa ngamathikithi abiza uR250 eWebtickets nasezitolo zakwaPick ‘n Pay.
Abaxhasi be-African Hair Awards yiGagasi FM, Independent Media, Isolezwe, Royalty, 1KZN TV neBon Hotel.