Bazokwaliwa bukhoma abangasafunwa
ABANTU abangafuni ukwaliwa bazokwaliwa bebukwa yizwe njengoba isiteshi uMzansi Magic simemezele ukuthi kuzoba nohlelo olusha oluthi Sengikhathele.
Kulolu hlelo oluzoqala ngoJanuwari kuzobonakala abesilisa nabesifazane abangafuni ukwaliwa betshelwa abebeyizithandwa zabo bukhoma kwithelevishini ukuthi uthando luphelile.
Lezi zindaba zivezwe umqondisi wezinhlelo kulesi siteshi, uReneilwe Sema, ngoLwesihlanu, bezothulela abezindaba izinhlelo ezintsha nezindala ezizoqala esontweni lesibili kuJanuwari.
UReneilwe uthe u-2018 ube unyaka omuhle kubo uma kuza ezinhlelweni njengoba benze kahle kakhulu futhi zijatshulelwe ngabaningi yingakho bengangabazi ukuthi u-2019 uzoba muhle kakhulu.
“Izinhlelo ezihlukile futhi ezingene zathandwa yiningi yizona esibone ukuthi azibuye kulesi siteshi kodwa ngeke sizishiye ngaphandle nezintsha ezizothokozelwa abaningi. Yize lusaqoshwa uhlelo iSengikhathele kodwa asingabazi ukuthi luzothakaselwa abaningi. Maduze uma konke sekuphelile sizokhipha imininingwane egcwele ngalo,” kusho uReneilwe.
Uthe akulona lodwa uhlelo olusha abazoluletha kodwa kukhona nomdlalo ozokhonjiswa ngeSonto ngo-8 ebusuku ozobheka impilo yasehostela nekamaskandi.
“Nakulo mdlalo maduzane sizokhipha konke ngokuthi ngempela yini engalindeleka kuwo. Kodwa uxoxa ngempilo yasehostela nekamaskandi nesithemba ukuthi uzojatshulelwa abaningi futhi ube nesifundo,” kuchaza yena.
Isolezwe lihabule ukuthi lo mdlalo uqoshelwe KwaMashu naseNanda eThekwini futhi ubophele abalingisi okukhona kubo uPastor Mjosty, Sthandwa Nzuza noZimiphi “Zimdollar” Biyela abangabasakazi boKhozi FM.
UReneilwe uphinde waveza ukuthi ngonyaka ozayo kuzobuya iThe Herd, Lockdown neKhaya.
Uthe emidlalweni ekade yaba khona okubalwa Isibaya, Isithembiso neThe River kuzoqala amasizini amasha aqukethe okuningi okuzojabulisa.
Ezinhlelweni zikaqedisizungu uthe kuzobuya Uthando Nesithembu, Living The Dream with Somizi, Papa Penny, Yobe neDate My Family esiqalile ukukhonjiswa.