Uthembisa ukusibuyisa eKZN isicoco
INTOKAZI yaseMandeni, emele iKwaZuluNatal emcimbini kazime Indoni Miss Cultural, ithembisa ukusibuyisa kulo nyaka lesi sicoco.
UThabisile Mthethwa (osesithombeni) uthe ngoDisemba 15 e-ICC uyena ozothweswa isicoco salo nyaka.
Ekhuluma neSolezwe uthe yisikhathi eside le ndondo iya kwezinye izifundazwe manje sekuyisikhathi sokuthi ibuye la yaqala khona.
“Nginamathemba amakhulu ngalesi sicoco salo nyaka. Ngifuna ukumela isifundazwe sami futhi ngifunde okukhulu ngesiko selokhu ngaqala ukuba yingxenye yentsha engenele Indoni,” kusho uThabisile oneminyaka ewu-19.
Uthe ungenele lo mcimbi ngoba efuna ukwazi kabanzi ngesiko.
“Ukunikwa ithuba elifana naleli futhi elifiswa abaningi kungenze ngafuna ukusebenza kanzima njengoba sibheke kulo mcimbi. Ngiyabonga kakhulu kubahleli bawo futhi ngiyathembisa ukuthi kuningi engizokwenza okuzobashiya bebambe ongezansi ngempelasonto ezayo,” kuchaza yena.
Ngesikhathi engakabi yingxenye yentsha ekwiNdoni uThabisile uthe ubengazi lutho ngemvelaphi yakhe ngisho nokusina nokucula ubengazi lutho ngakho.
“Njengoba bengifunda u-matric nje kulo nyaka Empoqabulungu High, kuningi engizokwenza ukuzikhulisa nokusiza enye intsha kodwa nokuqhuba imfundo yikhona okuhamba phambili kimi,” kuchaza yena.
Le ntokazi izoba ngezinye zezingu-12 ezikhethwe ukuba yingxenye yalo mcimbi, nokuyothi ngoLwesihlanu ngaphambi komcimbi omkhulu kube nombukiso oyoba semigwaqweni yeTheku .
Kuwo lo mcimbi kulindeleke ukuthi kunandise uRingo Madlingozi nabanye abaculi.
Kuyophinde kubonakale abalingisi bemidlalo emikhulu KwaZulu-Natal Uzalo neMbewu.