I-ASA isukumela olwezimenenja zabasubathi
UKUDLONDLOBALA kwezinga lezokusubatha eNingizimu Afrika sekuvule isibhobo sokungena kwabantu abazibiza ngokuthi bayizimenenja zabagijimi abahweba ngabo.
Lokhu kuholele ekutheni abe-Athletics South Africa (ASA) babe nomhlangano wokubonisana nabo nabaqeqeshi. Umhlangano othathe izinsuku ezimbili ubukwelinye lamahhotela kanokusho e-OR Tambo International Airport, eGoli.
Exoxa neSolezwe umengameli we-ASA, u-Aleck Skhosana,uthe bekufanele umhlangano ube khona ukuze bafundisane futhi batshelane ngemigomo le nhlangano esebenza ngayo.
“Bekubalulekile ukuthi sikwenze lokhu ngoba inhlangano (ASA) nabasubathi bayo bayadlondlobala. Ukukhuphuka kwezinga kubagijimi kuheha abantu abafuna ukuba yizimenenja zabo,” kuchaza uSkhosana.
Ugcizelele ukuthi bebezobatshela ngemigomo inhlangano esebenza ngaphansi kwayo nokuthi uma ufuna ukuba yimenenja yomsubathi kufanele ulandele imigomo ethile.
“ENingizimu Afrika sinezimenenja eziwu-28 kuphela bese kuthi ezingaphansi kwe-IAAF zibe yisishiyagalombili,”kulanda uKhosana.
Okunye okuvele kulo mhlangano wukwaziswa kwezimenenja ukuthi abasubathi baqhamuka emaqenjini abo futhi bangaphansi kwenhlangano okuyiyona enikezwe umsebenzi wokwengamela lo mdlalo eNingizimu Afrika.
USkhosana uthe zidonswe ngendlebe izimenenja ngokuthi kufanele ziqinisekise ukuthi kuyasetshenziswana.
“Akukhona kwavula zibhuqe nje. Kunemigudu okufanele ilandelwe,” kusho uSkhosana.
“Abagijimi abakwazi ukumelwa yizimenenja ezineminyaka esukela kwewu18 kuya phezulu. Ngaphansi kwalokho basabizwa ngamajuniya. Konke kuhambe njengoba bekuhleliwe,” kubeka uSkhosana.
Uphinde wathi kusukela ngonyaka ozayo sekuzokuba nezivivinyo ezibhalwayo ezizokwenza umuntu ofuna ukuphatha umgijimi emukelwe kwi-ASA ngokuphumelela kwakhe ezivivinyweni.
“Ngokunjalo nakwi-IAAF kukhona okubhalwayo ngaphambi kokuthi wemukelwe ekutheni usungakwazi ukuphatha umgijimi. Nathi sekuzohamba kanjalo sekuzobhalwa ngaphambi kokuthi sikwemukele,” kusonga uSkhosana.
Ngokuthola kweSolezwe abantu abathanda ukwenza izifundo zokusingatha izindaba zabagijimi sebengaxhumana ne-ASA ukuze bathole yonke imininingwane njengoba ziqala ngokuqala konyaka ozayo.
Imvamisa abasubathi baseNingizimu Afrika nase-Afrika jikelele baphethwe yizimenenja zaphesheya kwezilwandle.
Yilezi zimenenja ezenza kube nzima ukukhuluma nabagijimi bakuleli ngaphandle kokuthi uma uthole eqeda ukusubatha. Ngaphandle kwenkundla yokusubatha ngeke usakwazi ngoba ukutshela kwezikabhoqo athi angakhuluma kuphela uma ungase uxhumane nemenenja yakhe eseFinland, kuvele kuthombe ukhiye entathelini.
Lo mengameli ukhuluma ngokuzethemba kulandela ukwenza kahle kwabagijimi bakuleli emiqhudelwaneni yase-Afrika nakweyomhlaba ababambe iqhaza kuyona.
Kusukela kumaCommonwealth Games abeseGold Coast e-Australia, kuma-African Senior Champs abese-Asaba eNigeria nakuma-IAAF World U20 Championships abeseTampere, eFinland,bashaye into ecokeme neyenza lo mengameli awulangazelele ngomdlandla u-2019.