Kunzima kwiChiefs emidlalweni ezayo
KUMELE ukuthi ixegisa amadolo kubona bonke abathintekayo kwiKaizer Chiefs imidlalo ye-Absa Premiership eyisithupha elandelayo uma uzobheka ifomu yayo neyamaqembu okufanele iguqule ngawo isimo esingesihle eebhekene naso.
Selokhu iChiefs ikhale ngaphansi kabili kulandelana – ikhishwe yi-Orlando Pirates kwiTelkom Knockout yaphinde yanikela ngamaphuzu kwiLamontville Golden Arrows – umqeqeshi wayo uGiovanni Solinas ubhekene nenkinga enkulu yokuguqula izinto.
Yize iChiefs inqobe kalula kwiCAF Confederation Cup lapho inenebule khona iZimamoto yaseZanzibar ngo 4-0 eNelson Mandela Bay Stadium, ihluleke yancama ukuqhubeka lapho ibigcine khona ishaywa yi-Arrows ebingasaphelele ngo 2-1.
Emidlalweni ewu-14 yeligi, iChiefs isishaywe kane. Idlale ngokulingana kweyisithupha yase inqoba emine okuyishiya endaweni yesikhombisa kwi-log.
Inkinga kaSolinas lapha wukuthi uma ubheka imidlalo yakhe elandelayo bese ucabanga ifomu yeqembu lakhe nezinguquko ahlale ezenza njalo, kunzima ukubona lapho ingaqala khona iqoqe amaphuzu. Njengoba iChiefs idlale owomlenze wesibili weConfederation Cup ekuhambeni izolo,uma ibuya lapho izokwamukela iSuperSport United ekhaya ngoDisemba 12.
Unzima ngazo zonke izindlela lo mdlalo ngoba ngokwefomu iSuperSport ingcono kakhulu okufakazelwa wukuthi ibe namaphuzu amaningi kunaweChiefs kodwa isele kuyona ngemidlalo emibili. Ngeke kubelula uma uSolinas eqeda noKaitano Tembo ngoba uzobe esebhekana nomqansa wokuqoqa amaphuzu kwiMamelodi Sundowns okuyiyona evikela isicoco seligi.
Nawo lo mdlalo weSundowns neChiefs usekhaya ngoJanuwari 5. Nakuwona lo mdlalo akubukeki kuzokuba lula kwiChiefs ngoba iSundowns ikhombisa izimpawu zokufudumala kwiligi.
Uma uSolinas eqeda lapho kuzofanele avakashele iBidvest Wits esembangweni wesicoco. Umdlalo ungoJanuwari 9 kanti ifomu yala maqembu ikhombisa ukuthi iChiefs izothwala kanzima. IWits isendaweni yesibili kwi-log lapho ilandelwa khona yiSundowns.
NgoJanuwari 15 iChiefs izobhekisa amabombo eThekwini lapho izobhekana khona naMaZulu elinye lamaqembu asefomini emangalisayo kulezi zinsuku. Kuyaziwa futhi ukuthi ezikaCavin Johnson azishaywa ekhaya.
Kuzolandela uBenni McCarthy lapho uSolinas ezobe esekhaya khona kwiCape Town City ngoFebhuwari 2. Owesithupha kule midlalo futhi omkhulukazi okungenzeka kube yiwo ocacisa okuningi ngekussa likaSolinas ngoba bazobe bebhekene nePirates e-FNB Stadium ngoFebhuwari 9.
Iqiniso lapha wukuthi abalandeli beChiefs abasayizwa kahle indaba kaSolinas kodwa-ke iyaziwa iChiefs ngokungaxoshi maphakathi nesizini. Ngokusho kukaFarouk Khan oyinkakha yomeqeqeshi oke wasebenza kakhulu kwiChiefs, asikho isidingo sokushintsha umshayeli kodwa imoto ibe ingekho esimeni esifanele.