OwoThongathi ayimhluphi eyezimbangi
UMQEQESHI woThongathi FC, uJohnny Ferreira, uthi akumkhathazi nakancane ukuthi iCape Umoya United isiqashe umqeqeshi omusha njengoba kade ibhedelwa yizinto iphekwa ngomunye wabanikazi bayo, uRoger De Sa.
La maqembu azotholana phezulu emdlalweni weNational First Division (NFD), ngoMgqibelo eBoland Stadium, eKapa ngo-3.30 ntambama.
Ziya kulo mdlalo nje, iCape Umoya (eyibambe emsileni kwi-log yeNFD) isanda kuqasha obeyiphini likaDe Sa, uDominic Isaacs, ukuba ngumqeqeshi. UDe Sa usekhona eqenjini kodwa usezogxila kwezokuphathwa kwalo.
“Ukufika komqeqeshi omusha kungasho izinto ezimbili. Kungasho ukuthi abadlali bazomamukela kahle umqeqeshi, bafune ukumdlalela, noma bangamamukeli kahle kwazise bebecijwa umuntu abebemhlonipha ongumphathi weqembu. Kodwa konke lokho akusikhathazi nakancane thina. Sishaywe imidlalo emithathu ilandelana, ngakho sifuna ukunqoba sibuyise umgqigqo wethu. Yilokho nje okubalulekile,” usho kanje uFerreira izolo.
UThongathi luke lwabalwa namaqembu amane abezihola phambili kwi-log yeNFD kodwa ukushaywa kathathu kulandelana kuziphazamisile ezikaFerreira njengoba sezisendaweni yesishiyagalolunye kwi-log, ngamaphuzu awu-16, emidlalweni engu-12.
“Le midlalo emithathu esishaywe kuyona, bekufanele siyinqobe kodwa sajeziswa ngenxa yokungashayi kwethu amagoli. Ngokwesimo somqondo wabadlali, kubalulekile ukuthi babuyelwe ukuzethemba ngokuthi bawunqobe lo mdlalo wethu neCape Umoya.
Uma ubuka nesimo se-log, siyasho ukuthi uma singanqoba sizobalwa namaqembu alwela isicoco seNFD,” kunezezela uFerreira.
Umgadli weCane Cutters, uSiyabonga Vilane nguyena ozihola phambili ngokuhlohlwa kwamagoli kwiNFD.
Usevalele phakathi amagoli ayisithupha. Nokho muva nje, ubonakala ehlelwe yifomu okuyisimo esimkhathazayo uFerreira.
“Kuyinto eyenzakayo kubadlali ukuthi behlelwe yifomu umhlaba wonke jikelele.
Nokuzethemba kufuna ukumhlasela njengamanje uVilane kodwa ngibona lo mdlalo wangoMgqibelo ubalulekile kakhulu ekutheni abuyise ukuzethemba kwakhe ngokushaya amagoli,” uphendule kanje uFerreira ebuzwa ngefomu kaVilane.