U-ISCO NO-HUGO LLORIS BAGINGQE AMAQANDA KOWE-BALLON D’OR
KUPHAMBANA imibono ngokuqokwa kukaLuka Modric waseCroatia odlalela iReal Madrid yaseSpain njengokunguyena obaqwaqwade bonke emhlabeni kunobhutshuzwayo okuholele ekutheni agoduke neBallon d’Or aklonyeliswe ngayo ngoMsombuluko ebusuku eFrance.
UModric uqokwa nje ungowokuqala ukwenza lokhu eminyakeni eyishumi lapho uCristiano Ronaldo wasePortugal odlalela iJuventus yase-Italy noLionel Messi wase-Argentina ogijima kwiFC Barcelona yaseSpain bebezenzela khona. KulokhuuRonaldo ulale isibili kwathi uMessi wabekwa endaweni yesihlanu.
Abathandi bebhola emhlabeni wonke bamjabulele uModric kodwa abanye babo bakhala ngokuthi akenzanga ngaphezulu kukaRonaldo. Umdlali wokugcina ukudla iBallon d’Or uKaka waseBrazil. Lokhu ukwenze ngo2007. UModric uklonyeliswa ngalokhu nje, uyena futhi okhethwe yiFifa njengomdlali obevelele ukubedlula bonke ku-2018 emcimbini obungoSepthemba. Bawu-180 abadlali bebhola emhlabeni abebevota njengoba uModric ethole amavoti angu-753. URonaldo uyena olale isibili ngawu-476 kwase kuthi u- Antoine Griezmann waseFrance odlalela i-Athletico Madrid yaseSpain yena wase ethola awu-414 endaweni yesithathu. Endaweni yesine kube uKylian Mbappe waseFrance ogijima kwiPSG yena othole angu-347. Indawo yesihlanu ithathwe uMessi ngamaphuzu awu-280. Uma uwahlanganisa amaphuzu atholwe uRonaldo noMessi adlula ngamathathu kuphela kwatholwe uModric yedwa okukhombisa ukuthi ubathathile abaningi lo mdlali yize kukhona ababona ngendlela ehlukile. E-Afrika,uMohamed Salah weLiverpool ne-Egypt ungene endaweni yesithupha ngamavoti awu-188 kwathi uSadio Mane odlala noSalah naseqenjini lesizwe laseSenegal wangena endaweni ka-22. U-Isco weMadrid noHugo Lloris ovimbela iFrance neTottenham bobabili baginqe amaqanda kwazise abazange bavotelwe ngisho nawumuntu oyedwa.