‘UMoyane wamosha imali wabulala nomnotho’
UKHOMISHANA wakwaSars oxoshiwe, uMnuz Tom Moyane, wamosha imali yabakhokhibentela enguR50 million, waphinde wabulala umnotho futhi akakulungele ukuthi angabuyiselwa emsebenzini.
Baphendule kanje abameli baMengameli uCyril Ramaphosa nabeJaji uRobert Nugent esicelweni esiphuthumayo ebesifakwe uMoyane eNkantolo eNkulu yasePitoli lapho kade efuna kuguqulwe isinqumo sikaRamaphosa sokumxosha emsebenzini.
UMoyane ufake lesi sicelo ngemuva kokuthi iNkantolo yoMthethosisekelo yamchitha njengoba kade efuna ukuphonsela inselelo isinqumo sikamengameli.
NgoLwesibili, ucele inkantolo ukuba ibeke eceleni isinqumo sangoNovemba 1 kulandela izincomo ezenziwa iKhomishini kaNugent ebijutshwe ukuba iphenye ngokuphathwa kwakaSars kusukela kungene uMoyane ngoSepthemba 2014.
Esicelweni asifake ngoLwesibili ngosizo lommeli wakhe, u-Adv Dali Mpofu SC, uMoyane uthe akazange anikwe ithuba ukuze aveze uhlangothi lwakhe.
UMpofu uthe uMoyane uzama ukuvimba uRamaphosa ukuba aqoke ukhomishana omusha wakwaSars kuze kuqedwe ukulalelwa kodaba lwakhe.
UMoyana uthe ikhomishini ayisiyo inkundla efanele ukuba ilalele udaba lwakhe.
Uphinde wakhononda ngokubakhona kuka-Adv Michael Katz naye obehleli kwikhomishini, wathi uKatz wayemele uRamaphosa ngesikhathi kuhleli iKhomishini yaseMarikana.
Uqhube wathi uKatz ungummeli kaRamaphosa.
“UMoyane akafuni ukubuyiselwa emsebenzini kodwa into alwisana nayo ukuthi kuguqulwe isinqumo sokuxoshwa kwakhe, uzimisele ukuthi abe ngumuntu omisiwe kuze kuphele uhlelo lwakhe lokuqondiswa ubugwegwe,” kusho uMpofu.