Ngeke angihlule uMchunu: Oosthuizen
UTHOMAS “Tommy Gun” Oosthuizen uyihleka usulu eyokuthi uzohlulwa nguThabiso “The Rock” Mchunu empini eyimpinda yebhande le-African Boxing Union (ABU) Cruiserweight e-Emperors Palace, eGauteng, ngoMgqibelo ebusuku.
U-Oosthuizen wabonwa njengowine ngamaphuzu ngamajaji ngesikhathi bebhekene ezinyangeni ezimbili ezedlule. Lokhu kulandelwe yizikhalo ezivela kubalandeli besibhakela abakholwa wukuthi uMchunu wenza okwanele ukuyinqoba. Uphromotha uRodney Berman weGolden Gloves uphoqekile ukuthi ayibuyisele eringini.
Impi ka-Oosthuizen noMchunu izoba ngeyosuku kwezihlelwe nguBerman ezibizwa nge”Repeat or Revenge” okubhekwe ukuthi zihanjelwe yizindimbane zabalandeli. Kwenye impi ebhekwe ngabomvu, umpetha we-International Boxing Organisation (IBO), uThulani “Tulz” Mbenge, uzovikela ibhande lakhe kuMiguel Vazquez waseMexico.
“Awukho umehluko kunempi yokuqala. Kulokhu ngibe nesikhathi eside ejimini. Sesiside isikhathi ngibuyile. Ngibuyele ekhaya, ngizizwa kahle. Ngiziqeqeshe ngokwanele. Akukuningi osekungakhulunywa manje, awuze uMgqibelo. Ngethemba ukuthi kulokhu uzoza kimina kakhulu abese esala engazivikele, bese ngiyamumangaza ngokungena ngaphakathi ngimsakaze ikhanda,” kusho u-Oosthuizen.
Kusuke isasasa ezinkundleni zokuxhumana ngesimo somzimba ka-Oosthuizen uma siqhathaniswa nesikaMchunu.
“Bakhona abantu abanemizimba. Ungabukeka uwucweshana kodwa ekugcineni kufanele ushaye isibhakela sengathi wakhiwe ngetshe. Ngenxa yezinyama ngeke akwazi ukushesha. Ngizobe ngishesha, ngishibilika. Izinyama aziyiwini impi. Akuyi ngobukhulu benja kodwa indlela elwa ngayo. Ngizomthola. Bakhuluma ngezinto abangeke bazenze. Nginezibhakela ezinzima, ngiyashesha. Uma ubuka uThabiso konke akwenzayo ngikuphinda kabili,” kusho u-Oosthuizen.
UTommy Gun (28-1-2), owayengumpetha we-IBO Light Heavyweight, akakaze ahlulwe ngumshayisibhakela waseNingizimu Afrika. Selokhu aqala isibhakela ngo-2008, usahlulwe ngu-Igor Mikhalkin emephuca ibhande le-IBO nyakenye.
UMchunu (19-5-0) uthe nakanjani uzoyiwina impi.
“Kulokhu kukhona amajaji aphesheya kwezilwandle. Impi ngiyilungiselele kahle. Ngizomehlula uTommy Gun,” kusho uMchunu.
UBerman uthe nakuba bekungesona isifiso sakhe ukuth impi kaMchunu noTommy Gun ibuyele eringini kodwa intando yabathandi besibhakela ayenziwe.
Ozowina phakathi kubona uzobhekana nompetha we-IBO Cruiserweight, uKevin “KO Kid” Lerena ngonyaka ozayo.