Kuzocaca ozovunwa yisimo kwiTelkom
KUYAYE kuthiwe lokho okulotshwe phansi okuyizinombolo akukaze kushaye eceleni kungakhathalekile ukuthi kusuke kukhulunywa ngani.
Nokho akukuningi okungashiwo ngeBaroka FC ezobhekana ne-Orlando Pirates emdlalweni weTelkom Knockout uma kubhekwa umlando wayo kulo mqhudelwano.
Umdlalo useNelson Mandela Bay Stadium, ePort Elizabeth, ngoMgqibelo ngo-6 ntambama.
Leli qembu lizobe liqala ngqa ukudlala kowamanqamu kodwa indlela elidlale ngayo kulo mqhudelwano ka-2018 ishiye abaningi bemangele. Liqale ngokushaya iLamontville Golden Arrows ngo 2-0 emdlalweni weLast 16.
Kuthe kusabhekwe lokho ezikaWedson Nyirenda zamangaza abaningi ngokuqumba phansi iMamelodi Sundowns ngo 2-0 kwi-quarter final. Abaningi bese becabanga ukuthi kuzophela ngephupho leBaroka lokwenza kahle kulo mqhudelwano ngesikhathi ibhekene neBidvest Wits kodwa yaphinde yamangaza abaningi idlula ngo 1-0.
Onozinti beBaroka, u-Ayanda Dlamini, noma u-Elvis Chipezeze abakaze balilande enethini ibhola selokhu kuqale iTelkom Knockout.
Ngabe lokhu kusho ukuthini ngeBaroka? Lokhu kuchaza ukuthi iPirates izokuthola kunzima ukushaya igoli kuleli qembu. Emdlalweni wokugcina we-Absa Premiership iPirates ibambane neMaritzburg United ngo 0-0 nokuyinto okumele imhluphe umqeqeshi wayo uMilutin Sredojevic.
IPirates nayo ayibanga nemidlalo elula ngaphambi kokuthi ifike kowandulela owamanqamu. Iqale ngokubhekana neChippa United eyishaye ngo 1-0 kwiLast 16.
Ngemuva kwalokho ihlangane naMaZulu yagcina iwine ngo 3-1 yize umdlalo wadlulela esikhathini esengeziwe kwi-quarter final. Umdlalo wamanqamu ubunzima kakhulu ngoba ibibhekene nezimbangi zayo ezindala iKaizer Chiefs eyishaye ngo 2-1.
OKUQAPHELEKAYO: IBaroka FC isakwaze ukufinyelela kuma-quarter final kuphela phambilini ngakho izobe iqophe umlando uma iwina iTelkom. Ngakoluye uhlangothi iPirates isifinyelele kweyamanqamu eyisishiyagalolunye kwiTelkom kodwa yakwazi ukuwina umdlalo owodwa kuphela. Zizowa Mo’ ngoMgqibelo koweTelkom Knockout.