Iwelela phesheya kwezilwandle iGolden Gloves
SENABELA phesheya kwezilwandle isitebele sesibhakela esihamba phambili eMzansi, iGolden Gloves Promotions kaRodney Berman esikhiqize ompetha bomhlaba abaningi kuleli.
Lokhu kuqinisekiswe uyena uBerman phakathi nesonto. Umatasa ulungiselela izimpi ezizoba se-Emperors Palace kusasa ebusuku. Impi yosuku kuzoba eyimpinda phakathi kukaThomas “Tommy Gun” Oosthuizen noThabiso “The Rock” Mchunu. Bazobanga ibhande le-African Boxing Union (ABU) Cruiserweight okuyibhande uMchunu ayengumpetha walo eminyakeni edlule. Kwenye impi, uThulani “Tulz” Mbenge uzovikela ibhande le-Internatinal Boxing Organisation (IBO) welterweight kuMiguel Vazquez waseMexico.
UBerman uveze ukuthi ngonyaka ozayo uzoyoqhatha izimpi phesheya kwezilwandle ngenhloso yokuphendlela amathuba abashayisibhakela bakhe.
“Ngonyaka ozayo sizohlela izimpi phesheya kwezilwandle ngokubambisana nesinye isitebele. Ngifuna ukwakha uMbenge e-America, ngimenze aziwe. Isigaba se-welterweight siyashuba manje, sifuna ukumbeka esicongweni.
“Laba abashayisibhakela abangcono kunabo bonke iGolden Gloves esike yaba nabo eminyakeni eminingi. Hhayi kuphela iGolden Gloves kodwa esibhakeleni saseMzansi. Ngikholwa wukuthi uMbenge uzoba yi-welterweight ephezulu kunawo wonke aseke akhiqizwa yileli zwe. Konke kusezandleni zakhe. Ungumshayisibhakela onekhono elimangazayo. Unempi enzima kusasa ngoba uVazquez wayengumpetha womhlaba futhi usesefomini. Kodwa ngiyamethemba uMbenge. Le mpi izovezwa umhlaba wonke,” kusho uBerman.
Akubuzwa ukuthi impi ezobe ibhekwe ngabomvu ekaMchunu no-Oosthuizen owayebonwe amajaji njengowinile kweyokuqala ezinyangeni ezedlule. Nokho izikhalo ezalandela zabakholwa wukuthi uMchunu uyena obekufanele awine, ziphoqe uBerman ukuthi impi ayibuyisele eringini.
“Mayelana nempi eyimpinda ka-Oosthuizen noMchunu, ngasho ekuqaleni ukuthi noma ubani owinayo, noma kunzima kangakanani ukukhipha owinile kodwa bangamabhokisa aphezulu bobabili. Noma ubani ozohlulwa, basengamabhokisa eGolden Gloves, basazoqhubeka,” kusho uBerman.
“Banezitayela ezihlukene. Esizokubona kule mpi, uThabiso uzoza ngamandla. Ekuqaleni ubeshaya isibhakela esisodwa angaqhubeki. Kodwa futhi u-Oosthuizen uzoba qatha kakhulu kulokhu. Kuzoba yimpi yemiqondo kubona bobabili. Le mpi ngiyenzele ukunika uThabiso ithuba ngoba bonke abantu bacabanga ukuthi washayelwa esakeni. Kuzoba yimpi enzima.”