Beziwushaya kosaziwayo uMenzi noNzwiri
BEKUSHANELWE amabala kuqhuma nemikikizo emagceni akubo kosaziwayo bakulesi sifundazwe, uMenzi Ngubane noDJ Nzwiri abebeshadelwa ngempelasonto.
UMenzi, odlala indawo kaJudas Ngwenya kwiSibaya kuMzansi Magic, ubeshadelwa ngokwesintu nguSikelelwa Sishuba eMnambithi.
Le nkakha yomlingisi ibihluleka nawukuyifihla injabulo yayo, ilokhu ifaka izithombe ekhasini layo le-Instagram.
NgoSepthemba wafaka izithombe efake imvunulo ethi uhlela umgcagco wesintu futhi akafuni ukubuzwa mibuzo, uzosho ukuthi uzoba nini kuphi.
NgoMgqibelo ufake i-video egida ethi sekuyenzeka, esho umgcagco. Omunye oyifakile, nguzakwabo uNhlanhla Mdlalose odlala indawo kaBongani naye obeshadelwa ekuqaleni kwenyanga eyedlule.
Kubonakala kuzihambela kahle izinsizwa seSibaya kwezothando njengoba ngomhla ka-22 kuzoshadelwa uZakhele Mabasa-Mokone olingisa indawo kaS’khaleni. Khonamanjalo, beziwushaya nakuDJ Nzwiri kubo eNyanini, eShowe, ngoMgqibelo. UNzwiri uzakhele udumo ngokudlala emicimbini yobumnandi eyahlukene futhi usebenza kakhulu naMaZulu FC ukunxenxa abalandeli ukuthi bagcwale enkundleni.
UNzwiri (36) beshadelwa nguNtosh Mcambi (28) asebethandane naye iminyaka emihlanu, abanangane naye.
Ubezinyaziswe nguDJ Sox, Websta, DJ 15, Pzet, Junior De Rocka, isikhulu saMaZulu uLunga Sokhela nabanye.
“Leli gxathu esilithathile likhombisa ukukhula. Empilweni kunezinto ongeke wazibalekela njengendoda futhi sengiyazi ukuthi noma nginomkhuhlane ngeke ungiphelele umoya ngoba ukhona umama uzonginakekela. Noma ngiphuma ngiyosebenza ngiyazi ngisebenzela umndeni hhayi ukuthi imali ngizijabulise ngayo,” kusho uNzwiri.
Uthe ngeke bawenze umshado omhlophe.