Bathikameze umsebenzi wamathenda angu-16
KUPHAZAMISEKE uhlelo lwamathenda kuMasipala weTheku emuva kokuthi iqulu lamadoda angaziwa licekele phansi ibhokisi okufakwa kulo imininingwane yamathenda, lasakaza amaphepha okufaka amathenda ngaphandle kwehhovisi elise-Old Fort Complex.
UMnuz Andre Peterson, oyinhloko yakwaSupply Chain Management kuMasipala weTheku, uthe lesi sigameko esenzeke ngoLwesihlanu siphazamise amathenda awu-16 okusho ukuthi ngeke zisaqokwa ngesikhathi esifanele izinkampani ezizokwenza imisebenzi ehlukene.
Esitatimendeni esithunyelwe kwiSolezwe, uPeterson ucele abantu ukuthi bahlangane nabo uma benezingqinamba ezithile.
“Siwavalile amanye amathenda abevuliwe ngenxa yalesi sigameko. Sizobazisa abantu ngakho konke okwenzekayo,” kusho uPeterson.
IMenenja kaMasipala weTheku, uMnuz Sipho Nzuza isigxekile lesi sigameko, yathi bavule icala emaphoyiseni futhi abathintekayo bazotholakala ngoba bayabhekwa kwi-video ye-cctv.
Abantu abaqophe ama-video alesi sigameko bebezwakala besola iDelangokubona KZN Business Forum ngalesi senzo kodwa uMnuz Bhamuza Mnyandu onguSihlalo weDelangokubona, uthe abazi lutho ngalesi sigameko.
Amathenda aphazamisekile ngawokulungisa iziteshi zikagesi, ukusika utshani, izitshalo ezimila eduze kweziteshi zikagesi, eyokuhambisa iphepha likaMasipala weTheku elibizwa ngokuthi Ezasegagasini Metro, eyokuqokwa kwenkampani ezokwenza i-logo entsha yeTheku, eyokuqokwa kwezinkampani ezizoletha izinsiza zemicimbi okubalwa amatende, ukupheka, isteji nakho konke okuthinta imicimbi.
Kuphazamiseke ukuqokwa kwenkampani ezokwenza abazoqoqa ulwazi kwabahlala emzileni uC3 corridor weGo Durban! kuzophazamiseka nokulungiswa komgwaqo uWande Cele noMaurice Gumede ku-ward 93, kuphazamiseke ukwakhiwa kwezindawo zokuhamba abantu emgwaqweni uMR 431 kwaward 5 eGeorgedale, kuzophazamiseka nokuqokwa kwezinkampani ezizolungisa inkundla yezemidlalo ekuZimene Road, kwaG eNtuzuma, kuzophazamiseka nohlelo lokufundisa abantu ukupheka, olokulungiswa kwamapayipi kuMarshall Drive nolokuqoqwa kukadoti kumaward angasebhishi okuwu-ward 28 no-ward 32.
Osomabhizinisi abanemibuzo ngokuphazamiseka kwalezi zinhlelo bayalelwe ukuba bathumele i-email ku-scmsupplierqueries@durban. gov.za
ULt Col Thulani Zwane wamaphoyisa KwaZulu-Natal ukuqinisekisile ukuthi kuvulwe icala lokucekela phansi impahla esiteshini iDurban Central, bekungakaboshwa muntu njengoba amaphoyisa esaqhubeka nophenyo lwawo.