Abadayisa ezokushayela enkantolo
BAZOVELA namhlanje enkantolo okuqulwa kuyo amacala athinta imali eThekwini abantu abahlanu ababoshelwe ukudayisa izincwadi zokushayela ezikhungweni zokuvivinya abafuna izincwadi zokushayela.
Baboshwe ngoLwesihlanu. Abane kubo basebenza esikhungweni sase-Underberg kanti oyedwa uboshwe esikhungweni saseHowick.
Ngokuthola kweSolezwe bebesiza abazobhala izincwadi zokufundela ukushayela ngokubakopelisa ukuze bathole u-100% bese bekwazi ukuqhubeka benze izincwadi zokushayela.
Umthombo osondelene nodaba abafuna usizo bebekhipha imali ehlukene. Kukhona abebekhipha R500, R2 000 no R3 500 ukuthola izincwadi zokufundela ukushayela nezincwadi ezigcwele zokushayela.
Okhulumela oKlebe eKZN, uCaptain Simphiwe Mhlongo, uthe abamangalelwa babekwe amacala okukhwabanisa nenkohlakalo.
“Sibophe abesifazane ababili namadoda amathathu ngamacala okukhwabanisa nenkohlakalo. Bazovela enkantolo yamacala athinta imali eThekwini ngoMsombuluko (namhlanje). Uphenyo luveza ukuthi bebesiza abazobhala izivivinyo zezincwadi zokufundela ukushayela ukuze baphase ngo 100%,” kusho uMhlongo. Uthe uphenyo luyaqhubeka. Okhulumela uMnyango wezokuThutha KwaZulu-Natal, uMnuz Mluleki Mtungwa, uthe kuyadumaza kakhulu ukuthi kusekhona abasebenzi abasenza lo mkhuba.
“Kuyadumaza ukuthi kukhona abantu abasenza inkohlakalo enjena ekubeni izingozi zingaka emgwaqweni. Kuyiqiniso ukuthi izingozi eziningi zidalwa ukungalandeli imithetho yomgwaqo. Uma kade ungatholanga izincwadi zakho ngendlela efanele kusho ukuthi awunalo lonke ulwazi lokuba ushayele. Lokhu kusifaka kwenkulu inkinga emgwaqweni,” kusho uMtungwa.
Ngaphandle kokuboshwa kwalaba kuthiwa kuzokwenziwa olunye uphenyo kulezi zikhungo nakwezinye ukuze kuzokhucululwa wonke amazambane abolile.
UMtungwa unxuse nomphakathi ogwaziswa abasebenzi basezikhungweni zokuvivinyelwa ukushayela ukuba ubike ukuze bathathelwe izinyathelo.