Ubonga uMdali osinde engozini
UBONGA uNkulunkulu owesifazane okhishwe etekisini ebivutha ubuhanguhangu engozini okushone kuyo abangu-15, eMpangeni.
UNksz Londiwe Myeni waseJozini, ungomunye wabahlanu abasinde ngokulambisa kusha itekisi besuka emshadweni.
Izolo uNksz Myeni, obelaliswe esibhedlela eNgwelezane utshele Isolezwe ukuthi usadidekile ukuthi usinde kanjani “besha”.
“Angazi ngempela ukuthi ngisinde kanjani etekisini ebisha. Besiphuma emshadweni, sesiya emakhaya ngesikhathi kwenzeka ingozi. Angazi noma inhlanhla noma kwenzekeni, noma uNkulunkulu ongihlengile. Ngiyambonga uNkulunkulu ngokusinda,” kusho uNksz Myeni ngamafuphi, egquma ngenxa yezinhlungu.
UNksz Myeni kube nzima ukuba aqhubeke nokukhuluma neSolezwe ngenxa yezinhlungu.
Nangesikhathi uNgqongqoshe wezokuThutha eKZN, uMnuz Mxolisi Kaunda ezombingelela ukuze amkhulekele, ubelokhu ekhale ngezinhlungu.
Kuthe ithimba likaKaunda selithandaza, wazwakala naye ekhuleka, ebonga kuNkulunkulu ngokusinda kwakhe.
UKaunda umqinise idolo ngokuthi uzolulama aphume esibhedlela maduze. Abanye abasindile bebengakwazi nokukhuluma. Omunye ubesayohlinzwa ngesikhathi kufika uKaunda nethimba lakhe. Isolezwe lithole ukuthi kule tekisi bekukhona abangani nezihlobo zabebeshada ngoMgqibelo.
Isolezwe lithole ukuthi njengoba amatekisi kade elandelana, bakwazile ukukhipha abahlanu abebengaphakathi etekisini ngesikhathi iqala ukusha. Kuthiwa umlilo ubusumkhulu bengasakwazi ukusondela. Balinda abezimo eziphuthumayo nezicimamlilo ukuba zizocisha umlilo.
UMnuz Victor Chetty ongumqondisi ophikweni lokusebenza kwamaphoyisa omgwaqo ngaphansi koMnyango wezokuThutha esifundazweni, uthe abasindile bakhishwe ngamalungu omphakathi.
“Ngesikhathi kwenzeka le ngozi bekunamanye amatekisi abelandelana evela emshadweni. Umphakathi ukwazile ukukhipha abanye abantu etekisini,” kusho uChetty.
Uthe ithimba labo lisebenze kusukela ngabo-7:30 ebusuku lapho kwenzeke ingozi kwaze kwaba u-3 ekuseni izolo.
“Kube umsebenzi onzima kakhulu, sizama ukutakula abantu nomgwaqo usuvaliwe. Kuze kwaba u-3 ekuseni namhlanje (izolo) sisebenza. Obekwenza kube nzima ukuthi uma kusha imoto kukhona nabantu kunzima ukucisha umlilo. Bekumele silinde kuze kube uyacimeka bese siyasondela ukuzama ukubakhipha. Ngingasho ngithi le ngozi ngenye yezinkulu ebinyantisa kakhulu, kwesezike zenzeka lapha eKZN,” kusho uChetty.
Ubonge kakhulu ithimba lamaphoyisa nabezimo eziphuthumayo, athe basebenze ngokuzikhandla kungelula.