UMaimane uzomangalela uRamaphosa ngeBosasa
UMHOLI weDA, uMnuz Mmusi Maimane, uthi uzothathela uMengameli Cyril Ramaphosa izinyathelo zomthetho ngodaba lweBosasa esibizwa nge-African Global emuva kokuthi uSihlalo wayo ethe abakaze basebenzisane nendodana kaRamaphosa.
Phambili uRamaphosa watshela uMaimane ukuthi indodana yakhe, u-Andile, yakhokhelwa uR500 000 ngomsebenzi eyayiwenzele iBosasa kodwa kwavela ukuthi imali yayiwumnikelo wokulekelela uRamaphosa ezinhlelweni zokhetho lobuholi be-ANC.
USihlalo we-African Global, uMnuz Joe Gumede, utshele uMaimane ukuthi ayikho inkontileka abake bayisayina no-Andile kodwa sebake banikelela uyise.
URamaphosa wathi uzoyikhokha imali eyanikelwa yiBosasa ezinhlelweni zakhe zokhetho futhi kuzoba nophenyo lokubheka bonke ababemnikelela.
UMaimane uthe ngeke bathule ngoba bayabona ukuthi uRamaphosa kunento ayifihlayo ngalolu daba lwaseBosasa.
“Ngithathe impendulo ye-African Global ngayidlulisela kubameli bethu ngoba ngifuna ukwazi ukuthi yiziphi izinyathelo okufanele ngizithathe ezizoba semthethweni.
“Kuyacaca ukuthi kukhulu okufihlwayo ngoba uMengameli waqale wathi uR500 000 owenkontileka yendodana yakhe neBosasa kodwa waphinde wahoxisa wathi kwakuwumnikelo wezinhlelo zakhe zokhetho.
“Ngifuna kube nophenyo ngodaba lwaseBosasa ngoba sekuphele izinsuku eziwu-14 ngimcelile uMengameli ukuthi aqoke ijaji eselithathe umhlalaphansi elizophenya kodwa uyangiziba,” kusho uMaimane.
Uthe baningi abaholi be-ANC abahlomule eBosasa beqiniselwa ezokuphepha emizini yabo, phakathi kwabo ubale uMnuz Gwede Mantashe, Nkk Nomvula Mokonyane, Mnuz Thabang Makwetla, uNkk Dudu Myeni, uMnuz Linda Mti, uMnuz Mbulelo Gingcana noMnuz Vincent Smith.
Uthe iBosasa uyayisola ukuthi yaxhasa namaphathi yowayengumengameli wezwe, uMnuz Jacob Zuma, adla uR3.5 million ngo-2015 nango-2016.
“Akufanele sithule uma uMengameli esebenzisa izinkampani ukuqhuba inkohlakalo, sizokwenza konke okusemandleni ukuyiqeda le nkohlakalo ngoba sifuna ukukhulisa umnotho nokudala amathuba omsebenzi,” kusho uMaimane.