Umlimi akagculisekile ngokuthathwa komhlaba
OMUNYE wabalimi abamhlophe KwaZulu-Natal akagculisekile ngendlela uhulumeni ahlose ukuthatha ngayo umhlaba emuva kokuba iPhalamende lamukele umthethosivivinyo wokuchitshiyelwa kwesigatshana somthetho esigunyaza ukuba udliwe ngaphandle kwesinxephezelo.
UMnuz Jacques Odendaal waseDumbe ukusho lokhu exoxa neSolezwe epulazini lakhe eliseNkonkotha ubuze ukuthi uma umhlaba uthathwa kuzokwenzekani ngezikweletu abanazo emabhange?
“Mina ngiyakweseka ukwabelana ngomhlaba ngokulingana kodwa lena yokuba kuthathwe umhlaba ngaphandle kwesinxephezelo angiyizwa kahle. Ngikusho lokhu ngoba kumanje mina kulo mhlaba waleli pulazi nginesikweletu sase-Absa sikaR9 million engisikhokha nyangazonke. Ngaphandle kwaso nginesinye isikweletu sikaR109 000 semishini yokunisela ummbila njengoba ngigxile ekulimeni ummbila. Manje uma ngiphucwa umhlaba kuzokwenzekani ngezikweletu zami? Engikwesekayo wukuba uhulumeni aseke uhlelo lokuhlukaniselana umhlaba ukuze nabamnyama basizakale ngoba mina ngizimisele ukuba ngibalekelele kwezolimo,” kusho u-Odendaal.
Uqhube wathi akufisayo wukuba uhulumeni athenge ipulazi bese evuma ukuba yena aliqashe ngenhloso yokusiza abantu bakhe abalisebenzisayo nabalakhele.
Kumanje uhlela ukunikeza imindeni emsebenzelayo nayifica epulazini umhlaba ongama-hectar awu-200.
NgoLwesibili amalungu awu209 ePhalamene avotele ukuba kuchitshiyelwe uSection 25 kwathi awu-91 aphikisana nalokhu.
Amaqembu aphikisa umthetho yiDA,COPE, FFPLUS, AgangSA, ACDP ne-IFP.
Amaqembu aphikisayo akhala ngokuthi i-ANC isebenzisa umthetho ukukhankasela ukhetho nokuzama ukujabulisa i-EFF.
I-IFP ikhononda ngokuthi abantu kabachazelwa iqiniso ngokuchitshiyelwa kwesigaba somthetho yingakho ingahambisani nawo.
Amaqembu awuvotele i-ANC, EFF, AIC neNFP.
U-Odendaal uthe uma uhulumeni engazikhokha izikweletu ababhekene nazo ngenxa yomhlaba abawuthenga nabawusebenzisayo, akazukuba nayo inkinga yokudliwa kwawo ngaphandle kwesinxephezelo.
Uqhube wathi yena akanacala ngoba wathenga umhlaba, akazange awebe noma awuphuce abantu yingakho ebhekene nesikweletu sikaR9 million.