Luseyinkanankana olobukhosi bakwaMbuyazi
LUSEKUDE ukuphothulwa udaba lombango wobukhosi bakwaMbuyazi KwaMbonambi, oseludonse iminyaka eyisishiyagalombili ngemuva kwesinqumo seNkantolo yoMthethosisekelo ngeledlule, esithi lolu daba aluqalwe phansi lulalelwe kabusha.
Isinqumo seNkantolo yoMthethosisekelo sithi kumele kubuyekezwe ukukhishwa esihlalweni kwenkosi yesizwe esakhothama, uZwelibhekile Mbuyazi.
UMbuyazi ukhothame eminyakeni eyisikhombisa edlule.
Lolu daba lufakwe enkantolo ephakeme kunazo zonke kuleli yinkosikazi kaMbuyazi, uNksz Sithembile Mkhize efuna ukuthi kungene indodana yayo esihlalweni sobukhosi.
Lolu daba kade lwalungena luphuma ezinkantolo ezahlukene. Abamangalelwa kuleli cala uNdunankulu waKwaZuluNatal, uMnuz Willies Mchunu, uMnyango wezokuBusa ngokuBambisana neziNdaba zoMdabu esifundazweni, umfowabo wenkosi, uMnuz Mkhanyiseni Mbuyazi. UZwelibhekile noMkhanyiseni bobabili bangamadodana enkosi esiyakhothama uMtholeni.
UZwelibhekile ukhothame kade ethathe izintambo zobukhosi ngo-2006.
“Kodwa kwaba nombango emndenini ngokuthi ngubani okumele abe yinkosi, umndeni wabe usuqoke isazi samasiko uSolwazi Langelihle Mathenjwa ukuba aphenye, aphinde axazulule lolu daba,” kusho amaphepha esinqumo seNkantolo yoMthethosisekelo.
UMathenjwa wathi uMkhanyiseni okumele abe yinkosi.
Undunankulu wabikelwa ngesiphakamiso sikaMathenjwa, wabe esehoxisa ukuhlonipha kwakhe uZwelibhekile njengenkosi.
UZwelibhekile wabe esefaka udaba enkantolo ukuze kubuyekezwe isinqumo sikandunankulu.
Ihhovisi likaNdunankulu lasiphikisa lesi sicelo.
UNksz Mkhize ube esefaka udaba enkantolo ngemuva kwesinqumo esasivuma umfowabo womyeni wakhe.
Isicelo sakhe sachithwa enkantolo ngo-2013, wabe eseya enkantolo yokudlulisa amacala.
Inkantolo yokudlulisa amacala nayo yamchitha njengoba egcine eseya eNkantolo yoMthethosisekelo yona enqume ukuthi lolu daba aluqalwe phansi lulalelwe.