Uphika eyemizamo yokumgudluza umholi weDA
UMHOLI weDA KwaZuluNatal uMnuz Zwakele Mncwango uchitha imibiko ethi uhleli ngesinqe ngemuva kokuvela kwezindaba zetulo lokumgudluza esihlalweni.
Engxoxweni neSolezwe, uMncwango uthe akazi ukuthi ivelaphi le mibiko ethi kuhlelwa ukuba asuswe esikhundleni sakhe njengomholi weDA isifundazweni.
“Nami ngafunda kwabezindaba ukuthi kunemizamo yokungikhipha esikhundleni,” kusho uMncwango.
Uthe le ndaba ikhulunywa ezingeni likazwelonke hhayi lapha KwaZulu-Natal.
“Angazi ukuthi le nto isukaphi ngoba lapha KwaZulu-Natal sibumbene, ungakhuluma noma yinamuphi umholi wenhlangano lapha KwaZulu-Natal uzokutshela le nto engiyishoyo,” kusho uMncwango.
USotswebhu weDA esiShayamthetho KwaZulluNatal uMnuz Francois Rodgers uthe ngeke aphawule ngalolu daba wacela ukuthi kuthintwe uMnuz Athol Trollip oyiPhini likaSihlalo wesigungu esiphezulu enhlanganweni.
Imizamo yokuthola uTrollip ayiphumelelanga, ucingo lwakhe belungabanjwa. Umyalezo athunyelelwe wona kuze kwashaya isikhathi sokushicilela engazange awuphendule.
Izindaba zetulo lokuxosha uMncwango zivele ngemuva kwemibiko ethi uSotswebhu wenhlangano ePhalamende, uMnuz John Steenhuisen akanazo iziqu zasenyuvesi lokho okwenza ikusasa lakhe lingacaci ngemuva kokhetho lwangonyaka ozayo.
Iqembu lisola uMncwango ngokuputshuka kodaba lokuSteenhuisen, kuthiwa ubuholi bukazwelonke bugovuza isifundazwe ukuba sishaye uMncwango ngevoti lokungamethembi.
Isolezwe lithole ngemithombo yalo ukuthi kunempi ekhona yokucwasana ngokwebala eqhubekayo kwiDA.
Umthombo uthi kukhona abamhlophe abangamthandi kahle uMncwango ngoba ugcwalisa abantu abamnyama enhlanganweni.
“Abamhlophe bathatha iDA njengento yabo, abazizwa bekhululekile uma bebona sekugcwele abantu abamnyama,” kusho umthombo.
Uthe iqembu lihlela ukushaya uMncwango ngenduku elishaye ngayo uNkk Patricia de Lille obeyiMeya yaseCape Town.
“Esinye isizathu mhlawumbe uMncwango ashayelwa sona wukuthi waphumela obala wakhombisa ukungahambisani nesinqumo sesigungu esiphezulu sokuxosha uNkk de Lille,” kusho umthombo.