Thenga imoto oyithandayo uselokishini noma emakhaya
EZABATHENGI
UKUTHI sihlala emalokishini noma emakhaya akusho ukuthi izinkampani zomshwalense kufanele zisiphathe kabi.
Lokhu ngikusho ngoba emasontweni adlule ngibhalelwe ngowesilisa waseMlaza ozibize ngoMaphumulo, ophathwe kabi ngabakwa-Audi ngesikhathi ezongcwaba umfowabo.
UMaphumulo wathenga i-Audi A3 eWestrand, eGauteng. Kuthe uma ezofihla umfowabo imoto yamnika izinkinga.
Uthinte abakwaAudi ukubachazela ngokwenzekayo bamyalela ukuthi akayicime imoto futhi bazothumela i-tow truck ezoyilanda bese enikwa enye imoto azoya ngayo emngcwabeni.
UMaphumulo wanikwa inombolo yenkampani ezomlethela enye imoto azohamba ngayo ngesikhathi eyakhe isalungiswa kodwa washaqeka uma esetshelwa ukuthi imoto yomshwalense (courtesy car) ngeke ilethwe elokishini kodwa kufanele ayoyilanda esikhumulweni samabhanoyi.
Ezabathengi zibuze abakwa-Audi ukuthi ngabe kuyinkinga yini ukusiza abantu abahlala emalokishini nasezindaweni zasemakhaya?
UNkk Carol Petrus uthe kubaphatha kabi ukuzwa ngokwehlele uMaphumulo ngoba abanankinga ngokusiza amakhasimende asemakhaya nasemalokishini.
Uthe akuwona umthetho wakwa-Audi ukuthi umuntu ohlala elokishini azilandele imoto ayinikwa wumshwalense kodwa lokhu kwenziwe wusonkontileka abasebenzisana naye.
Uthe imoto kaMaphumulo izolungiswa bese edilivelwa yona futhi usenikiwe nemoto azohamba ngayo ngesikhathi esalinde i-A3 yakhe.
Ezabathengi zimthintile uMaphumulo waqinisekisa ukuthi bamthintile kwa-Audi futhi bayamsiza selokhu kungenelele Ezabathengi.
Sithanda ukukhumbuza abantu ukuthi ukuhlala elokishini noma emakhaya akufanele kubavimbe ekuthengeni izimoto abazithandayo futhi nomshwalense kufanele ubalekelele noma ngabe bakuyiphi indawo.
Uma bengalutholi usizo abaludingayo ezinkampanini zezimoto noma zomshwalense kufanele bafake isikhalo ku-ombud for short term insurance ku-www.osti.co.za
*Ezabathengi zikhumbuza abazohlukanisa izitokofela zemali ukuba bangalokothi bakhiphe ukheshi ebhange ngenhloso yokuyohlukanisa emzini othile.
Amaphoyisa neSabric bathe abantu mabacele ukuthi imali ifakwe kumaakhawunti asebhange amalungu ezitokofela ngoba lokhu kusho ukuthi akekho ozophuma nesamba ebhange.
Aphinde agqugquzela abantu ukuthi bangaphathi ukheshi uma beyothenga njengoba kuwuDisemba kodwa basebenzise amakhadi.
Kuthiwe baqaphele noma besebenzisa ama-ATM ngoba izigebengu ziphume ngobuningi bazo zizobheka abathithiziswa imali yesitokofela neyebhonasi.
*Umxazululi wezinkinga zempesheni, iPension Funds Adjudicator (PFA), uNksz Muvhango Lukhaimane, uveze ukuthi uthole izikhalo eziwu-9 794 kulo nyaka.
Uthe lesi sibalo sikhule ngo-30% uma eqhathanisa nezikhalo ayezithole ngonyaka odlule.
Ihhovisi lePFA ligubha iminyaka ewu-20 lasungulwa kwazise iPFA yokuqala yaqokwa ngoJanuwari 1, 1998.
UNksz Lukhaimane uthe ziwu-4 405 izikhalo azixazululile kulezi eziwu-9 794 ebezingenile.
Eziwu-2 571 bezingadingi ukuxazululwa yihhovisi lakhe, eziwu-1 462 zithole isixazululo esijabulisa zonke izinhlaka ezithintekayo kwathi eziwu-367 zavalwa ngezizathu ezehlukene.
UNksz Lukhaimane uthe uzosebenza ngokuzikhandla ukusiza umphakathi ohlushwa yizikhwama zempesheni.
Phakathi kwezikhalo azitholile uNksz Lukhaimane ubalule ukungakhokhwa kwemali yempesheni ngesikhathi nenkinga yabaqashi abangayifaki imali ezikhwameni zempesheni yabasebenzi.
Ugxeke abaphethe izikhwama zempesheni ngokungalandeli umthetho njengoba ethe bayabayeka abaqashi abangayifaki imali ngesikhathi.
Uthe ihhovisi lakhe lithathe izinsuku eziwu30 ukuxazulula izinkinga zabantu uma kuqhathaniswa neziwu-90 ebelizithatha kudala.
“Abasebenzi bePFA benza konke okusemandleni ukuxazulula izinkinga zabantu ngekushesha kodwa izikhwama zempesheni zithatha isikhathi eside ukuphendula. Ezinye ziletha izimpendulo ezingagculisi okusho ukuthi sike sikhulume nazo isikhathi eside ukuze sisize abantu,” kusho uNksz Lukhaimane.
Uthe ezinye izikhwama azifuni ukunika amalungu azo imininingwane efanele okuholela ekutheni agcine esexhumana nabaziphethe.
Ugqugquzele abantu ukuthi baqinisekise ukuthi bathola imininingwane emisha yezikhwama zabo zempesheni minyaka yonke ukuze bahlale besazi isimo sabo sezimali.
Abafuna usizo lomxazululi wezinkinga zempesheni bangamthinta ku-pfa.org.za
Uma ufuna usizo lwezabathengi ungathumela i-email kuboniswa.mohale@ inl.co.za