Ukhale wemuka nowezinwele
UMCULI ozakhele udumo kwiJoyous Celebration 21 ngengoma ethi Ngena Nawe nethi Tinyembeti, uZamo Dlamini, ukhale wemuka nomklomelo weFemale Celebrity Hair Influencer kuma-African Hair Awards abeseWavepark Gateway eThekwini ngoLwesihlanu.
UZamo (29), waKwaManzini eSwatini kodwa osehlala eMidrand eGoli, uthe ujabule kakhulu ngokuhlabana kulo mqhudelwano.
“Mina bengingazi ukuthi ngezitayela zami eziwumsangano sengingawina indondo. Bengixakeka nje ukubona abantu bengishutha uma ngihlangana nabo kanti bachazwa yizitayela zami.”
UZamo uthe wayengazi ngalo mncintiswano wabacwali bezinwele kodwa wabona bekhombisa ukuthanda izithombe zakhe ku-instagram.
“Baxhumana nami, bengitshela eceleni ngalo mqhudelwano futhi benginxenxa ukuba ngingenele. Ngangena kanjalo-ke,” kusho uZamo obonakala kwiJoyous Celebration 19 eyaqoshwa eGrace Bible Church eSoweto, kwiJoyous Celebration 20 eyaqoshwa eMoses Mabhida Stadium eThekwini nakwiJoyous Celebration 21 eyaqoshwa ebandleni likaMbhishophi TD Jakes ePotter’s House e-USA.
Kwenzeka lokhu uZamo ubesanda kuhlabana emqhudelwaneni wamaciko aseSwatini iMTN Swama Music Awards abengoDisemba 1, kumunxa weBest Swati Solo Artist.
Lo mculi we-Afro Soul, oke wacula ngokuhlanganyela noCharacter, Sdunkero, Madumane noDJ Cleo, uphumelele ngecwecwe lesibili alikhiphe kulo nyaka ehamba yedwa elisihloko sithi Inhlanyelo-The Seed.