Amaphoyisa axwayisa ngokuminza
KUTHIWA sebeqalile ukuminza abantu abazama ukuzijabulisa nokupholisa ukushisa kwelanga ezingxenyeni ezahlukene KwaZulu-Natal.
Amaphoyisa asekhiphe isexwayiso emphakathini, enxenxa abantu ukuthi baqaphele njengoba ngalesi sikhathi sonyaka abantu abaningi bethutheleka emabhishi nasemadamini beyobhukuda.
Okhulumela amaphoyisa KwaZuluNatal, uLieutenantColonel Thulani Zwane, uthe izigameko eziningi zokuminza ezijwayele ukwanda ngalesi sikhathi sonyaka zidalwa ubudedengu notshwala. Uthe zikhona izigameko zakamuva ezibikiwe selokhu kuqale uNovemba kodwa akanaso isibalo sazo.
Isolezwe lithole ukuthi ezigamekweni zakamuva kubalwa esenzeke ngoMgqibelo odlule eMeerensee Beach, eRichards Bay, lapho kuminze khona umfana oneminyaka engu-16.
Okhulumela abezimo eziphuthumayo iNetcare 911, uMnuz Shawn Herbst, uthe babikelwa wumndeni ngokunyamalala komfana obebhukuda, isidumbu sakhe satholakala sintanta emanzini.
Kwesinye isigameko esenzeke ngoNovemba 25 kwaminza owesilisa oneminyaka engu-35 kwi-swimming pool egcekeni lomuzi eLa Lucia, eThekwini. Kuthiwa isidumbu salo wesilisa satholwa ngowesifazane osebenza endlini, abakwaNetcare 911 bafika evele eseshonile.
Nanka amathiphu okugwema ukuminza:
Ungangeni ezingxenyeni okungabhukudwa kuzo ebhishi ngoba amagagasi ajwayele ukuba namandla ngakhona.
Gada amagagasi ngaphambi kokubhukuda, uma enamandla ungangeni.
Ungayi ezindaweni ezijule kakhulu olwandle noma kwiswimming pool.
Ungabhukudi uma uphuzile ngoba ungashesha ukukhathala noma ungabi nawo amandla emanzini.
Bhukuda eduze kwalapho kunabatakuli abasebenza ebhishi ngaso sonke isikhathi.
Lalela imiyalelo yabasebenzi basebhishi ngoba bayasho uma kunengozi.
Qaphela amafulegi abekwa ebhishi ngoba imibala yawo ihambisana nezexwayiso.
Gwema ukubhukuda uma usuthi kakhulu.
Ungabhukudi ekuseni kakhulu nasebusuku nalapho kungenisa khona umfula.
Izingane mazibhukude nomuntu omdala ozozigada.