IPirates ishaywe yachizela izintatheli emuva komdlalo
UKUPHUNYUKWA yiqatha kweOrlando Pirates koweTelkom Knockout ngoMgqibelo ebusuku eNelson Mandela Bay Stadium, ePort Elizabeth, akuzange kwehle kahle eqenjini okufakazelwe wukuchizela kwalo izintatheli ngemuva komdlalo abashaywe kuwo yiBaroka FC sekukhahlelwa amaphenathi.
Ngesikhathi kusadlalwa izithunywa zePremier Soccer League (PSL) bezilokhu ziwudlulise njalo umyalezo ezintathelini ukuthi ngemuva komdlalo kuzoyiwa egunjini elithile elingasezindlini zokushintshela lapho abadlali bamaqembu womabili bezobe bezophendula yonke imibuzo.
Kwamukelwe ngenjabulo enkulu lokhu ngoba ukuthola abadlali eduze ikakhulukazi abePirates akuyona into elula njengoba kunemigomo nemibandela eminingi uma kufanele kukhulunywe nabo.
Nangempela sifikile leso sikhathi umdlalo usuphelile kwehliwa kwangenwa egunjinikodwa abadlali nabaqeqeshi bePirates abazange babonakale nangokhalo. Okuyikhona obekuxaka lapha wukuthi nazo izithunywa zePSL bezibukeka zididekile njengazo izintatheli ebezimi izixongololo kulindiwe.
Bagcine bephumile abadlali bePirates egunjini labo kodwa bekuyilaba abebengadlali. Ngokomyalelo wePSL bekungafanele abezindaba bakhulume nalaba badlali kodwa bekumele balinde laba abebesenkundleni nalaba abebesebhentshini. Ngokubona kuhamba isikhathi izintatheli zize zabuza ukuthi yini okufanele yenzeke kwagcina kucaca ukuthi iBaroka yodwa ezimisele ngalokhu kwaqhutshekwa nayo.
Ngesikhathi kwenzeka lokhu kuqhamuke unozinti wePirates obengadlali uBrilliant Khuzwayo efa yinsini wafika waxolisa ezintathelini ngokulinda into engekho. UKhuzwayo usho lokhu nje ubhalwe ebusweni ukuthi kukhona akwaziyo. Nendlela abehleka ngayo ibikhombisa ukuthi uyazi ukuthi bonke laba bantu balinde into engekho.
“Ngiyaxolisa bafowethu ukunazisa ukuthi laba bantu enibalindile kade bephumile (ngomunye umnyango), ngakhoke nilinde into engekho,” usho kanje uKhuzwayo wodumo kwiKaizer Chiefs naye eyophuma ngomnyango umbona ngisho ebusweni ukuthi iyamkitaza le nto eyenzekayo.