UBartlett ucacisa eyokungafesi kwawePSL
adlule, agxume ahlale ezikhaleni zakamuva ezivelile. I-Ajax Cape Town isanda kuhlukana noMuhsin Ertugral kwathi iChippa United yakhomba indlela u-Eric Tinkler.
IBlack Leopards ifake amasondo uJoel Masutha kwathi iFree State Stars yaxosha uLuc Eymael. UMasutha usebanjiswe umsebenzi kwiChilli Boys. Nokho akwaziwa ukuthi uzobamba isikhathi esingakanani kuleli qembu likaSiviwe Mpengesi osezakhele igama ngokuxosha abaqeqeshi.
“Okwamanje angiwubheki umsebenzi wokuqeqesha, ngisamile. Ngiyalibheka manje iqembu engifesa kulona, angisawufuni noma yikuphi umsebenzi. Kunabaphathi bamaqembu engingathandi ukusondelana namaqembu abo ngenxa yendlela abenza ngayo izinto,” kusho uBartett.
Kumanje uBartlett ungelinye lamaphini omqeqeshi weBafana Bafana, uStuart Baxter. Uphinde ahlaziye ibhola esiteshini sethelevishini, iSuperSport. Uthe akhona amaqembu abekade emfuna kulawa asanda kuhlukana nabaqeqeshi kodwa wawachiliza. Emaqenjini e-Absa Premiership kunabaphathi abaziwayo ukuthi abayizwa eyokunika abaqeqeshi isikhathi sokuhlanganisa iqembu.
Abanye kuhlale kuputshuka izindaba zokuthi bayagxambukela emsebenzini wabaqeqeshi nokugcina kuholele ekutheni abanye bagcine beshiyile. UMasutha uxoshwe kwiLeopards ethembile ukuthi uzonikwa ithuba lokuhlanganisa iqembu kwazise lisanda kubuya kwiPremiership.
“IBlack Leopards ingithintile ifuna ukwazi ngesimo sami kodwa ngayitshela ukuthi okwamanje angikawudingi umsebenzi wokuqeqesha,” kusho uBartlett.