Isiphakamiso esenziwe yiSAHRC ikhipha umbiko

KUZOBA yimpoqo kubona bonke abafundi bakwaGrade 10 no-11 abafunda ezikoleni zakuleli ukuthi babhale indaba ngamalungelo abantu.

Lokhu kuvezwe yiSouth African Human Rights Commission (SAHRC) izolo ikhipha umbiko ngamacala amaningi abikwe kule khomishini onyakeni wezimali u-2016/2017.

U-Advocate Tseliso Thipanyane, isikhulu esiphezulu sale khomishini, uthe lokhu bakwenza ngokuhlanganyela noMnyango weMfundo eyisisekelo. Uthe bavumelene ngokuthi wonke umfundi owenza la mabanga abhale indatshana.

“Abafundi bazobhala ngamalungelo abantu. Wonke umfundi uzoyenza le ndaba ukuze bafunde ngamalungelo abantu.”

Usihlalo wekhomishini, u-Advocate Bongani Majola, ukugcizelele ukuthi minyaka yonke bagqugquzela abafundi ukuthi babhale ngaphansi komncintiswano wezikole iSchools Moot Court.

“Ngalokhu abafundi bayakwazi ukufunda ngamalungelo. Uma bebhala nemindeni yabo ibamba iqhaza kulokhu,” kusho uMajola.

Uveze ukuthi amacala amaningi abikiwe athinta indaba yokucwasa nokubukelwa phansi kwamalungelo abantu nokuthi eminyakeni emihlanu edlule amacala abikiwe ayafana uma uqhathanisa neminye iminyaka.

Kusukela ngo-2014 kuya ku-2016 amacala athinta ukulingana andile esuka ku-493 aya-749.

“Ayanda amacala athinta ukucwasa njengoba kwanda ukusetshenziswa kwezinkundla zokuxhumana (Twitter, Facebook). Abantu bacwasa ngokobuhlanga besebenzisa igama eliqala ngo-K.”

Icala elibe sematheni elikaNkk Vicky Momberg owathuka iphoyisa uConstable Clement Mkhondo embiza ngegama eliqala ngo-K. Wagwetshwa iminyaka emithathu ebhadla ejele unyaka owodwa walengiswa.