Asingadembeseli uma sizwa sikhathala

isihluleka ukuphaka igazi elanele elidingwa yizingxenye ezehlukene zomzimba. Umsebenzi wenhliziyo wukwemukela igazi eselingcolile elisuka emzimbeni, yona ilithathe ilidlulisele emaphashini liyohlanjwa, ligezwe. Iphinde inhliziyo yemukele igazi eselihlanjiwe lisuka emaphashi, kungumsebenzi wayo futhi inhliziyo ukuthatha leli gazi eseligeziwe nelinamandla ilihambise ngokuliphakela ezindaweni ezehlukene zomzimba. Inhliziyo njalo uma ishaya isuke iphaka igazi elihlanjiwe iliyisa emzimbeni, iphinde yemukele elingcolile ilihambise emaphashini liyogezwa njengoba bese sishilo ngenhla. Kuyaye kuthi uma kukhona okuphazamisa ukwenzeka kwalo msebenzi, bese lokhu kugcina sekubanga lezi zimpawu esesikhulume ngazo.

Uma inhiziyo seyehluleka ukuphaka amalitha ayisihlanu uma ishaya, lokhu kungabanga isiyezi ngoba ubuchopho abusawutholi loya mmumatho obuwudingayo. Abanye bagcina sebephathwa yikhanda nokukhohlwa kulandele. Umsebenzi wegazi elihlanjiwe wukwenza kube khona amandla ezicutshini nasemzimbeni wonke. Uyabona yini ukuthi uma leli gazi liphuma lingaseneli, azoya ngokuncipha la mandla umzimba uhlale ukhathele. Inhliziyo esiphelelwe ngamandla okukhipha igazi, kugcina ekuphakeni kwayo ingasakwazi ukulikhipha lonke igazi kuyo inhliziyo, lokhu okuholela ekutheni igazi linqwabelana enhliziyweni bese iyakhukhumala. Lokhu kuvele kuholele ekunqwabelaneni kwegazi emaphashini ngoba phela kalisakwazi ukungena lonke enhliziyweni ngenxa yaleliya ebelisalele. Amadamu egazi emaphashini adala ukuthi amaphaphu asindane, umoya ungaguduzi kahle bese kuba nzima ukuphefumula, umoya unqamuke, ucinane, uhefuzele, ukhwehlele into engapheli bese ukuvuvukala kusuka kwesingezansi ezinyaweni kunyuke nomlenze.

Okunye okubalulekile okulandela ukungaphakwa kwegazi elanele yinhliziyo:

• Ukushoda kwegazi eliya ezinsweni. Izinso zingagcina zilimala kakhulu, zife nokufa zingabe zisasebenza. Lokhu kwenzeka kancane kancane. Yile nto edida abantu ngoba umuntu usuke ezazi engumqemane kanti uselimele kakhulu ngaphakathi. Lapha kungaba nobuhlungu obungabekezeleki ezinhlangothini, ukhathale, uhlanze, uphelelwe nayigazi futhi ungazibona ulokhu ungenwa yizifo kalula. Ukufa kwezinso kungasho ukuphela kwempilo kuwe okanye uma unenhlanhla ugcine usuphila ngemishini ehluza igazi ikhiphe udoti ezinsweni.

• Ubuhlungu bamalunga emzimbeni okungaba amadolo, amaqakala, amanyonga, iqolo, amahlombe, izingalo, izinyawo nokunye. Ukushoda kokuphakwa kwegazi kuholela ekomeni, nokukhandeka kwamaxhwala kulezi zindawo ezishodelwayo. Izindawo ezingamalunga zidinga igazi elinamandla elizokwenza ilunga lisebenze ngokuxhumana nomzimba wonke. Uma sekuphakwe kwashoda, maye ubuhlungu obuzolandela. Isimanga uyaye uthole kokunye lapha ukuthi kuthiwe usuphethwe ngamathambo, usuyohlala koBrufen nakoTramadol uyoze uyongena egodini. La mathambo avele ashiywe ngaphandle kokufuna imbangela nomnyombo wobuhlungu belunga. Yinselelo enkulu le abantu bakithi ababhekena nayo.

Muzi wakithi asiyeke ukuba nenkani singasukumi uma sizwa ukukhathala komzimba, isiyezi nokunqamuka komoya uma siphefumula, ukuphelelwa ngamandla. Kuyasiphoqa ukusukuma thina sonke:

• Esibakhulu ngomzimba, noma izimpawu zingekho zihlole kudokotela wenze i-ECG

• Esisebenzisa amaphilisi eBP nakashukela siyaphoqeka ukucela odokotela bethu basihlole nge-ECG

• Sonke esinezihlobo ezigula ngale ndlela, lezi zifo ziyathanda ukuhamba emndenini. Masingalindi amathonsi abanzi hleze sizosole!

Mpilonde!!