Kuzophambana uRantie no-Erasmus kwiCity
BANGASE baphambane kwiCape Town City abagadli ababili beBafana Bafana okungoKermit Erasmus noTokelo Rantie abazakhele olukhulu udumo besadlala kwi-Orlando Pirates.
Nakuba isikhulu seCity, uJohn Comitis sikuphika futhi sikucacisa ukuthi asifuni ukukhuluma ngakho, leli phephandaba, selingakusho kugcwale umlomo ukuthi ayinuki ingosiwe.
Abazazi kangcono bathi u-Erasmus useNingizimu Afrika futhi usanda kubonakala esengxoxweni ebibukeka ijulile nowayenguzakwabo kwiBucs osengumqeqeshi weCity, uBenni McCarthy. Ngesikhathi uComitis ethintwa ngalokhu uzwakalise ukunengeka wathi, “Ufuna ukungibuza ngoKermit angithi? Ayikho leyo nto futhi angazi ukuthi iqhamuka kuphi.”
Ngemuva kwalokho ube esevala ucingo.
Leli phephandaba likujwayele nokho ukuthi isikhulu sikhulume ngale ndlela kudlule izinsuku ezimbalwa kwenzeke lokhu ebesikade sikuchitha. Nangendaba yokuhamba kukaLebohang Manyama no-Aubrey Ngoma, uComitis ubekhuluma kanje kodwa kugcine kwenzekile.
Kukhulunywa no-Erasmus ogcine ukubonakala ePortugal kulandela ukuhluleka kwakhe eFrance. URantie osayine kwiCity ekuqaleni kwesizini uyena ozoshenxa. Kuzokhumbuleka ukuthi u-Erasmus noRantie babebulala izizwe bedla izicoco nePirates beholwa uBenni esengumdlali.
Inkinga ngoRantie, ogcine ukubonakala eqenjini laseTurkey, ukuthi akangeni khaxa egiyeni kwiCitizens okufakazelwa ukuthi kusukela esayinile akakaze abonakale enkundleni emdlalweni omqoka. Kwenzeka konke lokhu nje, ungomunye wabayikha ngamafosholo kuleli qembu.
Nakuba kungaqinisekisiwe kodwa u-Erasmus useNingizimu Afrika nje, yingoba uselihlukanisile ifindo likasofa silahlane neVitória de Setubal kwazise nakhona kufike kwafana nalokhu okumxoshe eFrance. URantie, oke wadlala nakwiBournemouth, yase-England uyaziwa ngezinkinga ngaphandle kwenkundla kodwa kulokhu akukona lokho ngaphandle kokuthi odokotela beCity bayahluleka ukumenza abe wumqemane ngendlela uBenni afuna ngayo.
Njengoba kuzovuleka iwindi lokushintshana ngabadlali emasontweni ambalwa ezayo kungenzeka laba bagadli abebegila izimanga kwiBucs baphambane kwiCitizens eqeqeshwa uBenni ababenaye kwiHappy People.