Lizogubha impumelelo elowokholo eMax’s Lifestyle
IQEMBU lowokholo elicula ngaphandle kwezinsimbi, Ithimba Le-Afrika litusa ukuhloniphana ngokuthi yikho okwenze lahlanganisa iminyaka engu-10 lindawonye.
Leli qembu, elinamalungu angu-15, lizogubha ukuqeda le minyaka eMax’s Lifestyle namhlanje.
Ilungu leqembu uMzwakhe Dlamini lithe ngesikhathi beqala ngo-2008 kwakungekho lula kodwa bakwazi ukumelana nezingqinamba.
“Sasithwele kanzima singenawo umfaniswano futhi sasiphoqeleka ukuqasha izimoto uma siyonandisa. Kwesinye isikhathi yonke imali yayiphelela ezimotweni. Sabekezela ngomusa kaNkulunkulu sakwazi ukuthola imoto nemifaniswano. Okuhle ukubonisana sihloniphane,” kusho uMzwakhe.
Uqhube wathi babonga ukwesekwa ngabantu njengoba kule minyaka bekhiphe amaalbhamu amathathu wonke awine indondo yeBest Acapella kumaCrown Gospel Music Awards. Eyokuqala kwaba yiHamba NoJesu kwalandela Umusa KaNkulunkulu kanti eyokugcina yiSesiphunyukile ewine ngenyanga eyedlule.
Uthe sezizonke izindondo zabo ziyisishiyagalolunye.
“Sike saya e-USA siyonandisa eWhite House futhi sike saya eMozambique naseBotswana. Sizimisele ngokuphuma kakhulu sikhulise iqembu.”
Uthe emcimbini wabo namhlanje bazobe begubha impumelelo yabo behambisana noHlengiwe Mhlaba, Thinah Zungu, Ayanda Ntanzi, Jumbo, Phindile Phewa noLungelo Hlongwane.
Kuzoqala ngo-6 ntambama kanti kungenwa ngoR50 kuthi iVIP ibe nguR200.