Imeya ijube uphenyo ngengane eminzile
UMASIPALA waseZululand usujube ithimba elizophenya ngokuminza kwengane eneminyaka emine eNcotshane oPhongolo, okusolwa ubudedengu babasebenzi bawo ngakho. Lokhu kushiwo iMeya uMnuz Thulasizwe Buthelezi otshele Isolezwe ukuthi izolo bavakashele umndeni kaLuyanda Gumede oshonile. Lo mfanyana oshone ngoMsombuluko, kuthiwa uphonseke emgodini obumbiwe abasebenzi bakamasipala abebewumbele ukulungisa ipayipi elivuzayo. Kuthiwa washiywa ungamboziwe ngesonto eledlule waze wagcwala amanzi emvula. UButhelezi uthe bakhathazekile ngalesi sigameko futhi bayazwelana nomndeni.
“Ngijube ithimba ukuthi liphenye ngesigameko ukuze uma kuwubudedengu babasebenzi bethu bathathelwe izinyathelo. Akukho emthethweni ukuthi abantu bashiye bengawuvalile umgodi, okunzima kakhulu uma sekuphume nomphefumulo,” kusho uButhelezi.
Uthe bazibophezele emndenini ukuthi bazoba nawo kuzo zonke izinhlelo zomngcwabo ukuze balekelele lapho kudingeka khona.
UMnuz Gabriel Zwane onguyisemkhulu kamufi ukuqinisekisile ukuthi kukhona izikhulu zaseZululand ezifikile izolo.
“Bathembisile impela ukuthi bazosilekelela futhi bayasigxeka nesenzo sabasebenzi babo. Sihlele ukuthi siyifihle ngesonto elizayo ingane,” kusho uZwane.
ULuyanda kuthiwa ubedlala nabangani bakhe ngesikhathi ephonseka emgodini, watakulwa wayiswa emtholampilo kwafike kwaqinisekiswa ukuthi useshonile. Oyiphini leMeya yasoPhongolo uNkk Busi Mvelase uthe nguyena owashayela ucingo abophiko lwamanzi eZululand ngoLwesihlanu olwedlule ngoba bekunepayipi elivuzayo. Uthe sekujwayelekile ukuthi abasebenzi bashiye bengayivalile imigodi uma bezosebenza.