Udilika kwababulala umuntu badla izicubu
UNINA wowesifazane waseSigodlweni eMtshezi owabulawa abesilisa ababili bamcwiya izitho zakhe zomzimba, ezinye bazidla uthi akasoze abaxolela ababulali bendodakazi yakhe yize iNkantolo eNkulu yaseMgungundlovu izolo ibagwebe udilikajele umuntu emunye.
UNkk Philisiwe Hlatshwayo uthi namanje akakakwamukeli ukuthi indodakazi yakhe, uNksz Zanele Hlatshwayo ayisekho emhlabeni. “Nakuba ngijabula ngokuthi ababulali bathole udilikajele kodwa ngisanesilonda ngesihluku ababulala ngaso ingane yami ibe inguthumbu, ngisazibuza ukuthi ingane yami yayenzeni ukuthi yayingaze ibulawe ngesihluku esinje.”
Uthe ukubulawa kwendokazi yakhe kubahlukumeze kakhulu bewumndeni njengoba kwaphoqeleka ukuthi bazile isikhathi esingangonyaka bengakwazi ukungcwaba ngenxa yokuthi bekusaqhubeka uphenyo lwamaphoyisa.
UNino Mbatha (32) noLungisani Magubane (32) balahlwe icala lokubulala uNksz Hlatshwayo ngoLwesibili, bagwetshwa odilikajele umuntu emunye izolo.
UMnuz Khayelihle Lamula obengummangalelwa wesithathu kuleli cala okuthiwa wayeshayela imoto eyayilayishe umufi ngesikhathi eyokwenzakaliswa yena utholwe engenacala wadedelwa inkantolo yathi abukho ubufakazi obanele obumhlanganisa naleli cala.
Umlisa wesine naye elalimbophile leli cala uMnuz Sthembiso Sithole yena ushonele ejele.
UMbatha oke waba yilungu lombutho wezokuvikela kuleli futhi obetshela inkantolo ukuthi uyinyanga, nguyena owazinikela kuqala emaphoyiseni ngemuva kokubulawa kukaNksz Hlatshwayo wathi usekhathele ukudla izicubu zabantu ngo-Agasti nyakenye.
Wathatha amaphoyisa waya nawo endlini yakhe lapho kwatholakala khona izicubu zabantu zifakwe emabhakedeni ezinye zisebhodweni lokupheka. Watshela amaphoyisa ukuthi ezinye izicubu zikaNksz Hlatshwayo bazidla nalabo ayeboshwe nabo ngoba babefuna ukwenza umuthi onamandla okwazi ukwenza ukuthi amaphoyisa angababoni uma begila imikhuba.
Abameli baMbatha noMagubane bazamile ukubakhalela ukuthi behliselwe isigwebo kodwa uMbuso wanqaba.
U-Adv Dianne Franklin obemele uMbatha utshele inkantolo ukuthi lona ammele wayeyisosha ejusthwe eRwanda nokulapho athola khona ukuhlukumezeka engqondweni ngenxa yesihluku ayesibona kubulalana amaHutu namaTutsi kuleliyazwe. “UMbatha uze wangeniswa esibhedlela ukuze athole ukwelulekwa.”
Lithula isigwebo, ijaji uPeter Olson lithe izimo zabamangalelwa zijwayelekile azikwazi ukwenza inkantolo ukuba igudluke esigwebeni esibekiwe ecaleni lokubulala elihleliwe okuwudilikajele.
U-Olson uthe kumele akhiphe isinqumo esincike ekutheni umphakathi ulindeleni.
“Abamangalelwa benza isihluku esimbi, abazange bayihloniphe impilo kamufi, abafanele ukuhlala nomphakathi,” kusho u-Olson.