UZikalala nethemba ngokhetho oluzayo
USIHLALO we-ANC KwaZuluNatal uMnuz Sihle Zikalala uthi ukhetho bazoluwina ngamalengiso njengoba bengeke babambisane namanye amaqembu ukwakha uhulumeni.
UZikalala uthe abakhankaseli ukukhala ngaphansi kodwa bazowina ngoba bakhankasa kuyona yonke indawo
“Kumele siwine ukhetho, asiyi okhethweni ukuze sibambisane nabathile. Sizoluwina ukhetho ngamalengiso ngeke sibambisane namuntu ukwakha uhulumeni.”
Ukusho lokhu izolo ntambama ekhuluma engqungqutheleni yokukhetha abazomela le nhlangano esiShayamthetho sesifundazwe nasePhalamende ngemuva kokhetho.
Uthe bayabeseka ubuholi obakhethwa engqungqutheleni yaseNasrec obuholwa nguMengameli Cyril Ramaphosa.
Uqhube wathi kunezinto ezibhalwayo kuthiwe amalungu azophazamisa inkulumo kaRamaphosa eyaziwa ngeJanuwari 8 azoyethula enkundleni yemidlalo iMoses Mabhida eThekwini lapho ezothula khona nomqulu wokukhankasela ukhetho.
“Ngifuna ukusho ukuthi alikho igatsha elithi lizophazamisa le rali, yinto engaqhamuki kwi-ANC. Sonke seseka uRamaphosa nobuholi obakhethwa.”
Uthe le ngqungquthela yokukhetha abaya esiShayamthetho nePhalamende kumele ifake zonke izinhlaka.
“Kumele ifake amaKhomanisi, intsha kubhekelwe nendaba yobulili. Akungakhethwa ngokwesifunda noma ngokwesifundazwe kodwa kukhethwe nabanye abaholi bakwezinye izifundazwe.”
Uthe akumele kube khona abazophusha abantu besebenzisa ukuthi babebaseka kubhekwe eNasrec.
“Kumele kukhethwe abantu abangayi lapha ukuyozimela bona kodwa abayomela inhlangano. Siyinhlangano ehlukile kunamanye amaqembu, amanye akhomba amalungu ngentshebe noma afune ama-cv thina sibakhetha ngentando yeningi abantu.”
Ugxibhe i-EFF wathi iwise ibhange yaphinde yantshontsha imali eNyuvesi yaseZululand.
Le ngqungquthela bekumele iqale ngo-12 kodwa ize yaqala ngo-5 ntambama.
UMnuz Mike Mabuyakhulu okunguye obephethe uhlelo uxolisile ngokuthi iqale ngemuva kwesikhathi le ngqungquthela.
Uthe izimo ezenze ukuthi iphuze ukuhlala bekumelwe abekomiti elibheka abantu abazojutshelwa ezikhundleni esiShayamthetho nasePhalamende
Phakathi kwabantu abebekhona kubalwa uDkt Zweli Mkhize noNkk Nocawe Mafu.