Ufakwe ngaphansi komlawuli umasipala waseNdumeni
IZINKINGA ebezilakanyana zikaMasipala waseNdumeni, eDundee, zigcine ziphoqa isigungu sikahulumeni wakwaZulu-Natal esiholwa, uNdunankulu uWillies Mchunu ukuba sinqume ukuthi umkhandlu uphucwe amandla.
Izolo uNgqongqoshe wezokuBusa nokuBambisana neziNdaba zoMdabu KwaZuluNatal, uNkk Nomusa Dube Ncube umemezele ukuthi lo mkhandlu usewufaka ngaphansi komlawuli womnyango wakhe ovunwa iSigaba -139 (1) (b).
“Emhlanganweni wakamuva weKhabhinethi yaKwaZulu-Natal, eholwa uNdunakulu sivumelene ukuba kungenelele uMnyango wezokuBusa nokuBambisana neziNdaba zoMdabu ngokuba kufakwe umlawuli. Lo masipala usube sezinkingeni eziningi okubalwa ukulwa kwangaphakathi nokuhlala isikhathi eside ungenayo iMeya noSomlomo. Kugcine sekuqokwa ubuholi obusha emasontweni edlule obuholwa uMeya uThabani Mlotshwa noSomlomo uLucky Khumalo nesibethemba kakhulu. Nokho izinkinga zibe ngaphezu kwamandla njengoba zisiphoqile ukuba singenelele ngoba nentuthuko ibingasayi emphakathini,” kusho uNkk Dube Ncube.
Phakathi kwezinto ezizokwenziwa uMlawuli ukuphuthumisa ukuvulwa kwamacala abathinteka enkohlakalweni kaR20 million ethinta amakhansela athile nezikhulu nabanye abasebenzi bangaphakathi.
Kuleli sonto kuvele umbiko ukuthi ulahlekile kwabuye kwathiwa imenenja emisiwe, uMnuz Sya Ntuli ubaleke nawo ngoba uthinta abangani bakhe. UNksz Dube Ncube uthe umnyango usunike umkhandlu omusha omunye umbiko.
Omunye wabasebenzi uhlebele Isolezwe ukuthi kunzima nokuvuka uzosebenza kumasipala.
UNkk Dube Ncube uthe umlawuli uzobaphenya izinqe abanukwa ngokusebenzisa budlabha izimali zomphakathi ukuba bangaphinde basondele kuzo.
Esinye isisebenzi sisolwa ngokukhanda inkampani engumbombayi behlangene nomfowabo oyiphoyisa lomgwaqo badla izizumbulu bekhokha kuyo njengeyenze umsebenzi.
Elinye ikhansela eligcine lixoshiwe lisolwa ngokukhwabanisa imali nebeliyikhipha sengathi kunikelelwa amasonto kodwa ibiya kubefundisi abathile bayidle nalo.
Kumanje neMeya uMlotshwa ihleli ngesinqe esisodwa njengoba nayo kungenzeka ijazi ligcwale umoya ixoshwa iqembu layo kanti naye ukuqinisekisile ukuthi ubiziwe ekomitini le-IFP ngoDisemba 19.