Luzosingathwa ngokungenzeleli olukaMabe
UMNUZ Dakota Legoete owumkhulumeli we-ANC wesikhashana uthe le nhlangano izolusingatha ngokungenzeleli udaba lwezinsolo zokuhlukumeza ngokocansi ezibekwe umkhulumeli wayo kazwelonke uMnuz Pule Mabe.
UMabe usolwa ngokuhlukumeza ngokocansi umabhalane wakhe ofake isimangalo kwi-ANC futhi udaba lwakhe luqale ukulalelwa izolo.
ULegoete uthe ukulalelwa kwalolu daba kuzothatha izinsuku eziyisikhombisa bese i-ANC inquma ukuthi ithatha ziphi izinyathelo ngalo.
“Siluthathela phezulu udaba lokuhlukumeza ngokocansi kodwa siyawahlonipha amalungelo azo zonke izinhlaka ezithintekayo. Lokhu kusho ukuthi ngeke simdalule umgilwa futhi sizovumela nommangalelwa ukuthi eze nofakazi bakhe njengoba kuzokwenzeka kumgilwa. Udaba luzolalelwa nguNkk Thoko Didiza noMnuz Sdumo Dlamini namanye amalungu engingeke ngiwadalule. Ngiyacela abantu badedele i-ANC ukuthi isingathe lolu daba ngoba ngeke ibe nokwenzelela kodwa luzophathwa ngendlela ezoletha ubulungiswa,” kusho uLegoete.
Selokhu uMabe esolwe ngokuhlukumeza ngokocansi ucele ikhefu.
UMnuz Bafana Khumalo weSonke Gender Justice elwa nokuhlukunyezwa ngokobulili, uthe kuyishwa ukuthi umbiko ngoMabe uvele kusanda kuphela umkhankaso olwa nodlame olubhekiswe ezinganeni nakwabesifazane.
Uthe bafuna ukubona i-ANC ithatha izinyathelo ezinqala ngoba yayithembise ukuthi ngeke ibabekezelele abahlukumezi engqungqutheleni eyayikhuluma ngokuhlukunyezwa ngenyanga edlule.
Ukhale ngokuthi akuqali ukuthi ilungu le-ANC lithinteke ezinsolweni zokuhlukumeza ngokocansi ngoba nozakwabo kaMabe owayengusihlalo eWestern Cape, uMnuz Marius Fransman, ebekwe icala lokuhlukumeza ngokocansi owayesebenza ehhovisi lakhe.
“Sikhathazekile ngokuhlukunyezwa kwabesifazane eNingizimu Afrika, siyathemba umthetho uzosebenza. Sicela i-ANC ithathe izinyathelo ezifanele emadodeni ahlukumeza abesifazane. Sizomeseka nomgilwa futhi sifuna ayovula icala ukuze omgilile ajeziswe wumthetho,” kusho uKhumalo.