Sigodliwe isinqumo kwelikaMalema
SIGODLIWE isinqumo ecaleni lomholi we-EFF, uMnuz Julius Malema ofuna umthetho iRiotous Assemblies Act uhoxiswe njengoba ethi uhambisana nobandlululo kwazise wawuvimba ukuhlangana kwabantu kudala.
Izolo iJaji Aubrey Ledwaba alisikhiphanga isinqumo kuleli cala yize ummeli kaMalema u-Adv Thembeka Ngcukaitobi ethe lo mthetho usetshenziselwa ukuthulisa uMalema.
UMalema ufake lolu daba eNkantolo eNkulu yasePitoli njengoba ekhala ngokuthi wumthetho owawusebenza ngesikhathi sobandlululo.
UMalema unamacala amabili abekwe wona ngaphansi kweRiotous Assemblies Act, elilodwa lisenkantolo yeMantshi eseNewcastle bese kuthi elesibili libe senkantolo yaseBloemfontein.
UNgcukaitobi uthe lo mthetho waphasiswa ngo-1956 ukuthulisa abantu ababekhuluma ngesihluku sobandlululo olwaluqhutshwa ngabamhlophe.
“Uhulumeni waleso sikhathi wasebenzisa lo mthetho ukuvimba abantu ukuthi bakhulume ngokukhululeka. Wawenzelwe ukuvimba uDkt Nelson Mandela ukuthi amemeze igama elithi Amandla,” kusho uNgcukaitobi.
Uthe uMalema angase avalelwe ejele ngenxa yalo mthetho uma eqhubeka nokutshela abantu ukuthi bahlale emhlabeni ongenamuntu.
“Ukhetho selusondele ngakho i-EFF kufanele ivunyelwe ukuthi ibeke imibono yayo ngaphandle kokusaba.
“UMalema akakaze agqugquzele abantu ukuthi babe nodlame kodwa usuke ethi abahlale emhlabeni ongenamuntu,” kusho uNgcukaitobi.
Uthe akufanele uMalema aboshelwe ukukhuluma iqiniso.
UMalema akazange afike enkantolo kodwa bekukhona iPhini lakhe uMnuz Floyd Shivambu otshele abalandeli be-EFF ukuthi bazolwa nokuthi kuphele imithetho yobandlululo ngoba izwe selibuswa ngentando yabantu.
Uthe akukwazi ukuthi esikhathini samanje kushushiswe abantu ngemithetho yobandlululo ikakhulukazi abakhuluma iqiniso njengoMalema.
Bekukhona nabanye abaholi be-EFF okubalwa kubo uMnuz Godrich Gardee nabanye.