Bahlalele ovalweni abe-Uber ngosomatekisi
BASEBENZA bejeqeza abashayeli bezimoto zakwaUber noTaxify KwaMashu, abakhala ngokusatshiswa ngabashayeli bamatekisi.
NgoLwesibili laba bashayeli baqhinqe esiteshini samaphoyisa kwa-E KwaMashu befuna ukuvikelwa kulezi zigameko zokusatshiswa, njengoba kuthiwa ezinye izimoto zabo sezilinyaziwe. Omunye wabashayeli be-Uber ocele ukungadalulwa, uthe akusasebenzeki ngoba bayesaba. Uthe sekunamasonto amabili kusatshiswa abashayeli bezimoto zakwa-Uber nakwaTaxify KwaMashu, eNtuzuma naseNanda. Uthe lo mkhuba usungenelele ngisho eNewlands.
“Emasontweni amabili edlule kwadutshulwa imoto yomunye wethu ngaseBridge City. Asisazi noma lesi sigameko sihlobene yini nokusatshiswa kwethu, Sinqume ukuthi siye esiteshini samaphoyisa siyozikhalela ukuze angenelele. Okubi ukuthi sesivinjwa ngisho sizihambela nemindeni yethu ngalezi zimoto esisebenza ngazo,” kusho lo mshayeli.
Uveze ukuthi uma bezama ukuxoxisana nosomatekisi bathi abayingeni indaba yabo ngoba abanayo nenhlangano. Isolezwe lithole ukuthi sekuboshwe nomunye wabashayeli bamatekisi ngezinsolo zokusabisa abe-Uber. Abashayeli be-Uber kuthiwa bacele umhlangano nosomatekisi bathi ngeke beze uma kusaboshwe ilungu labo.
Omunye umshayeli weTaxify naye ocele ukuthi ligodlwe igama lakhe, uthe kunezigameko zokushaqwa kwezimoto zabo, kwesinye isikhathi baphucwe okhiye. Uthe uma bezifuna izimoto batshelwa ukuthi kumele bakhokhe.
OyiPhini likaSihlalo weKwaMashu Taxi Association uMnuz Thulani Nxumalo, ethintwa izolo uthe usesiteshini samaphoyisa. Uthe bazolungisa udaba lokuboshwa kwelungu lawo.
“Sifuna ukuzozwa ukuthi uboshelweni nokuthi abekwe phela icala ukuze kucace. Asizazi izikhalo zabashayeli be-Uber futhi akukho zimoto zabo ezilinyaziwe KwaMashu. Uma kukhona ezilimele mhlawumbe kwenzeke kwezinye izindawo,” echaza.
UNxumalo uthe abakwaziyo ukuthi inkinga iqale ngesikhathi abashayeli be-Uber neTaxify sebengena emarenki bethatha abagibeli. Uthe batsheliwe ukuthi abawuyeke lo mkhuba, kwamiswa nezimoto zalabo abantshontsha abagibeli bamatekisi. Utshele iphephandaba ukuthi konke kuhamba kahle nesimo sidambile emuva kokwenzeke ngoLwesibili.
Okhulumela amaphoyisa KwaZulu-Natal uCaptain Nqobile Gwala uthe kuboshwe owesilisa oneminyaka elinganiselwa ku-40, osolwa ngokuthumba. Uthe abashayeli be-Uber neTaxify bakhale ngokushaqwa kwezimoto zabo ngosomatekisi kodwa ezigcine zibuyisiwe.