Sichithwe yinkantolo esabaphakela izikole
BAKHALE ngaphansi abaphakela izikole KwaZulu-Natal abayise uMnyango wezeMfundo enkantolo befuna kumiswe lonke uhlelo olukhona lokuqoka abazophakela izikole.
INkantolo eNkulu yaseMgungundlovu ichithe isicelo salabo sonkontileka abebefuna ingamiswa inkontileka yabo abayithola ngo2016/2017.
Okhulumela umnyango, uMnuz Sihle Mlotshwa, uthe labo sonkontileka bebefuna kumiswe ukuqokwa kwabazophaka befuna nokuthi umnyango ukhokhe izindleko zecala.
“Ithimba labameli bomnyango likwazile ukuphikisana nalokhu ngoba bazi kusuka ngoMashi kulo nyaka ukuthi umnyango uzoyinqamula inkontileka yabo. Baziswa futhi nokuthi bazoqhubeka baphake kuze kuqokwe abasha abazokwenza lo msebenzi.” Uthe nakuba babazi ukuthi inkontileka izonqanyulwa kodwa labo sonkontileka banqume ukufaka isicelo esiphuthumayo ngenyanga edlule. “Inkantolo ilisusile ohlwini leli cala ngoba ithi aliphuthumi. Abameli bosonkontileka kumele bachaze ukuthi kungani kungamele bakhokhe izindleko zecala ngoba bafaka lolu daba bathi luyaphuthuma ekubeni babazi ukuthi aluphuthumi.” UMlotshwa usho lokhu nje umnyango usanda kuphothula izigcawu zokuhambela izifunda ezehlukene lapho ubuchazela labo abafuna ukufaka izicelo zokuphakela izikole ngendlela okumele bayilandele. Lezi zigcawu bekugcwala kuthi phama abantu abafuna lo msebenzi ozokhishelwa iminyaka emithathu.
“Siluphothulile lolu hlelo lokuhambela izifunda ezehlukene. Besilandela yonke imigomo ukuze kungabikhona abakhalayo,” kusho uMlotshwa.
Ihlale ibangwa ithenda yokuphakela abafundi njengoba abaphakayo basuke bengafuni ukuphucwa iqatha emlonyeni.
Kuzokhumbuleka ukuthi umnyango wayalelwa ukuthi uqale phansi lonke uhlelo lokuphakela abafundi.
Kwabe sekuqashwa ababephaka ukuthi benze lo msebenzi kuze kuqokwe abasha.
Abasha kulindeleke ukuthi baqokwe ngonyaka ozayo.